نۇر-سۇلتان قالاسىنداعى ەكى قوسىمشا ستاتسيونار جۇقپالى اۋرۋلار اۋرۋحاناسىنا بەيىمدەلدى. قالالىق پسيحيكالىق دەنساۋلىق ورتالىعىنىڭ 230 توسەگى مەن قر قورعانىس مينيسترلىگىنىڭ باس اسكەري كلينيكالىق گوسپيتالىنىڭ 90 توسەگى , دەپ حابارلايدى Egemen.kz.
ەكى ستاتسيوناردا دا رەانيماتسيالىق توسەكتەر بار. ولار كوروناۆيرۋستىق ينفەكتسيانى ەمدەۋ ءۇشىن بارلىق قاجەتتى مەديتسينالىق جابدىقتارمەن جابدىقتالعان.
«اۋرۋدىڭ ورتاشا جانە اۋىر اعىمى بار ناۋقاستاردى سول جاعالاۋداعى پسيحيكالىق دەنساۋلىق ورتالىعىنىڭ ناركولوگيالىق بلوگىنا, سونداي-اق اسكەري گوسپيتالعا جاتقىزامىز», دەدى ەلوردانىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.
ونىڭ ايتۋىنشا, پسيحيكالىق دەنساۋلىق ورتالىعىنىڭ ەمدەلۋشىلەرى باسقا كورپۋسقا اۋىستىرىلادى.
وتكەن جىلى پسيحيكالىق دەنساۋلىق ورتالىعى مەن باس اسكەري كلينيكالىق اۋرۋحانا جۇقپالى اۋرۋلار اۋرۋحانالارىن اشقان ەدى. اۋرۋدىڭ قارقىنى تومەندەگەنى بايقالىپ, 2020 جىلدىڭ تامىزىندا ولار ۋاقىتشا جابىلدى.
«ەلىمىزدەگى كورونۆيرۋسقا شالدىققان ناۋقاستاردىڭ ءوسۋى ماۋسىم-شىلدە ايلارىنا كەلەدى. وتكەن جازدى ەسكە تۇسىرەتىن بولساق, اۋرۋدىڭ شىڭى ءدال وسى ايلار بولدى. حالىقتى بارىنشا ۇيدە ۇستاۋ قيىن. ادامدار قوعامدىق ورىندارعا بارىپ, سانيتارلىق تالاپتاردى ساقتامايدى», دەپ ءتۇسىندىردى ۆەدومستۆو باسشىسى.
نۇر-سۇلتان قالاسىندا كوروناۆيرۋسقا شالدىققان 1877 ناۋقاس ينفەكتسيالىق ستاتسيونارلاردا جاتىر, توسەك-ورىن جۇكتەمەسى 77%-دى قۇرايدى. جانساقتاۋ بولىمىندە 147 ادام, ءوجج-دە 30 ناۋقاس جاتىر.
«كوروناۆيرۋسپەن كۇرەستە جالعىز ءتيىمدى ءادىس - ۆاكتسينكاتسيا. ول ءوزىمىزدىڭ دە, جاقىندارىمىز بەن اينالامىزداعى ادامداردىڭ دەنساۋلىعىن دا قاۋىپسىزدەندىرۋگە مۇمكىندىك بەرەدى», دەپ ايتتى تيمۋر مۇراتوۆ.