«قايراتتىڭ» مەرەيلى ساتتەرى

ارادا 10 جىل وتكەن سوڭ الماتىلىقتار حالىقارالىق تەمىرجولشىلار وداعى كۋبوگىندا توپ جارسا, 1976 جىلى ءبىرىنشى ليگا كوماندالارى اراسىنداعى سايىستا قارسىلاس شاق كەلتىرمەدى. ال 1987 جىلى «قايرات» كسرو چەمپيوناتىندا جەتىنشى ورىندى يەلەندى. بۇل – قازاقستاندا جاساقتالعان كوماندانىڭ اتالعان دوداداعى ەڭ جاقسى كورسەتكىشى. ەندى وسى وقيعالاردىڭ ارقايسىنا جەكە-جەكە توقتالا كەتەيىك.

1965 جىلى «قايرات» ا كلاسىنداعى ەكىنشى توپتا ونەر كورسەتىپ, ەكىنشى ورىن­عا تابان تىرەدى. ءبىز كوش باسىنداعى ەرەۆاننىڭ «اراراتىمەن» بىردەي ۇپاي جيعانىمىزبەن, قوسىمشا كورسەتكىشتەر بويىنشا ارمەنيالىقتار الدىمىزدى وراپ كەتتى. سوعان قاراماستان جەرلەستەرىمىز كەلەسى ماۋسىمدا مىقتىلارمەن كۇش سىناسۋ مۇمكىندىگىنە يە بولدى. 1966 جىلى جوعارى ليگاداعى 19 كوماندا اراسىنان الماتىلىقتار 12 ورىندى يەلەندى. 36 كەزدەسۋ وتكىزگەن ءبىزدىڭ ويىنشىلار 35 ۇپايدى قورجىنعا سالدى. تارقاتىپ ايتساق, 12 رەت ۇتىپ, 13 رەت جەڭىلىس تاپتى. تاعى 11 ماتچ­تا تەڭ ەسەپ تىركەلدى. دوپ ايىر­ماشىلىعى – 30:39. وسى جارىستا قالىڭ توپتىڭ اراسىندا قالىپ قويساق تا, «قايراتتىڭ» ويى­نى جاقسى اسەر قالدىردى. ولار ەشبىر باسەكەدە قارسىلاستارىنان ءىرى ەسەپپەن جەڭىلگەن جوق. تىپتەن كەيبىر كەزدەسۋلەردە قيىننان قيى­ستىرىپ, ماڭىزدى گولدار سوقتى. ماۋسىم اياقتالعان سوڭ وسى جايتتاردىڭ بار­لىعى ەسكەرىلىپ, قازاق­ستاندىق كلۋب «جە­ڭىسكە دەگەن جىگەرى» ءۇشىن سىي­لىعىمەن مارا­پاتتالدى.

1976 جىلى «قايرات» حالىقارالىق تەمىرجولشىلار وداعى كۋبوگى جولىنداعى جارىسقا قاتىسۋ قۇرمەتىنە يە بولدى. ءدال سول ماۋسىمدا قورعاۋشى سەيىلدا بايشاقوۆ پەن قاقپاشى قۇرالبەك ورداباەۆ سىندى قوس قانداسىمىز رەسپۋبليكامىزدىڭ باس كو­مانداسىنىڭ جەيدەسىن كيگەن ەدى. سەيىلدا جامبىلدىڭ «ەنەرگەتيگىنەن», ال قۇرالبەك شىمكەنتتىڭ «مەتاللۋرگىنەن» اۋىسىپ كەلدى.

ايتۋلى دوپ دوداسىنداعى وزدەرىنىڭ تۇساۋكەسەر كەزدەسۋىن جەرلەستەرىمىز كو­شي­­­تسەنىڭ «لوكوموتيۆىمەن» وتكىزدى. ەكى ماتچ­تى دا ءوز پايداسىنا شەشكەن «قايرات» كەلەسى كەزەڭگە ەش قينالماي ءوتتى. ەسەپ – 4:1 (ۇيدە), 1:0 (سىرت الاڭدا). كەلەسى باسەكە شيەلەنىسكە تولى بولدى. الماتىدا سوفيا­نىڭ «سلاۆياسىنا» 1:3 ەسەبىمەن ەسە جىبەرىپ, جاعدايىن قاتتى قيىنداتىپ الدى. دەسەك تە ۆيكتور كورولكوۆ جەتكەشىلىك ەتكەن كوماندا قارىمتا كەزدەسۋدە بارىن سالدى. كەرەمەت ويىن ورنەگىن كورسەتكەن «قايرات» ءوز جانكۇيەرلەرىنىڭ كوز الدىندا بولگاريانىڭ بەتكەۇستار كومانداسىن جەر سيپاتىپ كەتتى. ەسەپ – 3:0. بۇل گولداردىڭ اۆتورلارى – ەۆگەني پيۋنوۆسكي, يۋري سەۆيدوۆ جانە ۆلاديسلاۆ ماركين.

فينالدا بۋحارەستىڭ «راپيدىمەن» كۇش سىناستى. سىرت الاڭدا رۋمىنيانىڭ ەڭ بەلدى كلۋبىنىڭ بىرىمەن وتكەن العاشقى ويىندا تەڭ ەسەپ تىركەلدى – 1:1. ۇزىلىسكە ساناۋلى مينۋتتار قالعاندا لۋپەسكۋ 11 مەتر­لىك نۇكتەدەن قاقپانى ءدال كوزدەسە, ەكىنشى تايمنىڭ بەل ورتاسىندا سەرگەي روجكوۆ مەرگەندىك تانىتتى. شەشۋشى ماتچتا «قاي­رات» مىناداي قۇرامدا ونەر كورسەتتى: قۇرالبەك ورداباەۆ, ۆالە­ري كرۋگلىحين, الەكساندر جۋيكوۆ, سەيىلدا بايشاقوۆ, ۆلاديمير اسىلباەۆ, ەۆ­گەني ميحايلين, ولەگ دولماتوۆ, ۆا­لەنتين سولداتوۆ (56 مينۋتتا ونى ۆلا­ديسلاۆ ماركين الماستىردى), ەۆگەني پيۋنوۆسكي, سەرگەي روجكوۆ جانە يۋري سەۆيدوۆ (65 مينۋتتا ونى ۆيكتور ابگولتس الماستىردى). رۋمىنيالىقتاردىڭ ساپىندا ءوز ەلىنىڭ ۇلتتىق قۇراماسىنىڭ التى بىردەي فۋتبولشىسى وينادى. بۇل باسەكەنىڭ تاعدىرىن ءبىر عانا گول شەشتى. 45-مينۋتتا سەۆيدوۆ ءۇش بىردەي قورعاۋشىنى الداپ ءوتىپ, روجكوۆقا ادەمى پاس بەردى. سۇرمەرگەن ءمۇلت كەتكەن جوق – 1:0. ءسويتىپ «قايرات» كەڭەس وداعى كلۋبتارى اراسىنان العاشقى بولىپ تەمىرجولشىلار كۋبوگىن جەڭىپ الدى. وسى جەڭىستىڭ ارقاسىندا الماتىلىق فۋت­بولشىلاردىڭ بارلىعى دا سپورت شەبە­رىنىڭ كۇمىس بەلگىلەرىن كەۋدەلەرىنە تاقتى.

ءيا, كۇللى قازاقستاندىق جانكۇيەردىڭ كوزايىمىنا اينالعان «قايراتتىڭ» كسرو چەمپيوناتتارىندا الا-قۇلا ونەر كورسەتكەنىن جاسىرا المايمىز. ءبىزدىڭ جىگىت­تەر بىردە مىقتىلارمەن كۇش سىناسسا, ەندى بىردە وسالدارمەن ويناۋعا ءماج­بۇر بولدى. 1974 جىلعى بىرىنشىلىكتىڭ قورى­تىندىسى بويىنشا كوش سوڭىندا قالىپ قويعان جەرلەستەرىمىز ەكى ماۋسىم بويى ءبىرىنشى توپتا باق سىنادى. 1975 جىلى «كرىليا سوۆەتوۆ» (كۋيبىشەۆ), «دينامو» (مينسك) جانە «تورپەدودان» (كۋتايسي) قالىپ قويىپ, ءتورتىنشى ورىنعا تۇراقتاسا, 1975 جىلى جارىس كەستەسىندە جەكە-دارا كوش باستاپ, قايتا ەليتالىق توپقا قوسىلدى.

1986 جىلى جوعارى توپقا ورالعان بەتتە الماتىلىقتار ادۋىندى ويىنىمەن كوزگە ءتۇستى. اسىرەسە كيەۆتىڭ «ديناموسى» (2:1) مەن ماسكەۋدىڭ «سپارتاگىنا» (1:0) قارسى كەزدەسۋلەردەن كەرەمەت اسەر الدىق. ءبىز­دىڭ جىگىتتەر كەڭەس وداعى فۋتبولىنىڭ ايتۋلى قوس الپاۋىتىن تىزە بۇكتىرگەندە, ال­ماتىداعى ورتالىق ستاديونعا جي­نالعان 30 مىڭعا جۋىق كورەرمەننىڭ ەرەكشە شاتتانعانى دا ەسىمىزدە. سول ماۋسىمدا 30 كەزدەسۋ وتكىزگەن الماتىلىقتار 11-ىن­دە جە­ڭىسكە جەتىپ, 11 رەت جەڭىلىستىڭ كەر­مەك ءدامىن تاتتى. تاعى 8 باسەكەنى تەڭ اياق­­تادى. دوپ ايىرماشىلىعى – 33:39. وسى­­­لايشا, جارىس كەستەسىندە جەتىنشى ورىنعا جايعاستى. بۇل – «قايراتتىڭ» كسرو چەم­پيوناتتارىنداعى ەڭ جوعارى كور­سەتكىشى.

سول ماۋسىمدا «قايراتتىڭ» جارتىلاي قورعاۋشىسى ۆاحيت ماسۋدوۆ كسرو بىرىنشىلىگىندە سوعىلعان ەڭ ادەمى گولدىڭ اۆتورى اتاندى. بۇل گولدى ول الماتىدا دنەپروپەتروۆسكىنىڭ «دنەپر» كلۋبىنا قارسى ويىندا سوققان ەدى. ال ۇنەمى شابۋىل وتىندە جۇرگەن ەۆستافي پەحلەۆانيدي قارسىلاستار قاقپاسىن 10 مارتە ءدال كوزدەپ, سۇرمەرگەندەر سايىسىندا ۇزدىك وندىقتىڭ قاتارىنا ەندى.