جاڭا جىل قارساڭىندا قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى, گەنەرال-لەيتەنانت نۇرلان جولامانوۆ «باتىس» وڭىرلىك باسقارماسىنا قاراستى 2087 جانە 2036 اسكەري بولىمدەرىنە سالتاناتتى جاعدايدا جاۋىنگەرلىك تۋلاردى تابىس ەتتى, دەپ حابارلادى قر ۇقك شق ءباسپاسوز قىزمەتى.
جاڭا جىل قارساڭىندا قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى, گەنەرال-لەيتەنانت نۇرلان جولامانوۆ «باتىس» وڭىرلىك باسقارماسىنا قاراستى 2087 جانە 2036 اسكەري بولىمدەرىنە سالتاناتتى جاعدايدا جاۋىنگەرلىك تۋلاردى تابىس ەتتى, دەپ حابارلادى قر ۇقك شق ءباسپاسوز قىزمەتى.
نامىس پەن ەرلىكتىڭ, ابىروي مەن داڭقتىڭ بەلگىسى بولىپ تابىلاتىن تۋلاردى شەكارا ۆەدومستۆوسى باسشىسىنىڭ قولىنان پودپولكوۆنيكتەر مۇحتار قانابەكوۆ پەن سانات جۇمانوۆ الدى.
اتالعان سالتاناتقا اقتاۋ قالاسىنىڭ, وبلىستىق جانە بەينەۋ اۋداندىق اكىمدىكتەرىنىڭ, «نۇر وتان» پارتياسىنىڭ وكىلدەرى قاتىستى.
– جاۋىنگەرلىك تۋ اسكەري ءبولىمنىڭ تاريحى مەن ەرلىك جولىن پاش ەتەتىن قاسيەتتى بەلگىسى بولىپ تابىلادى, – دەپ اتاپ ءوتتى گەنەرال-لەيتەنانت نۇرلان جولامانوۆ ءوز سوزىندە. – وسى تۋدىڭ استىندا تۇرىپ ساربازدار مەن ساردارلار, گەنەرالدار ەلىمىزدىڭ تاۋەلسىزدىگىن, اۋماقتىق تۇتاستىعىن جان اياماي قورعايتىن بولادى.
وسى كۇنى بەينەۋ شەكارا وتريادىندا شەكاراشىلارعا 48 پاتەردىڭ كىلتى تاپسىرىلعانى دا ەرەكشە اتاپ وتەرلىك وقيعا. وسىلايشا 4 ءۇي پايدالانۋعا بەرىلدى. ءسويتىپ, «باتىس» وڭىرلىك باسقارماسىنىڭ شەكاراشىلارى جاڭا جىلدى جاڭا پاتەرلەردە قارسى الدى. ساقشىلاردىڭ وزدەرى دە مۇنى مەرەكە قارساڭىنداعى ەڭ تاماشا سىيلىق رەتىندە قابىلدادى.
وسى ورايدا, كەلەسى جىلى ەكى ءۇيدىڭ پايدالانۋعا بەرىلەتىندىگىن, وسىلايشا بەينەۋ شەكارا وتريادىنداعى اسكەري قىزمەتشىلەردىڭ 100 پايىزى تۇرعىن ۇيمەن قامتىلاتىندىعىن ايتا كەتۋ كەرەك. شەن تاققان قىزمەتشىلەردى تۇرعىن ۇيمەن قامتاماسىز ەتۋ ەلباسى جولداۋىنىڭ ىسكە اسىپ جاتقاندىعىنىڭ باستى كورىنىسى بولىپ تابىلادى.
شەكارا قىزمەتى وسىلايشا تۇرعىن ءۇي سالۋ مەن جوندەۋدىڭ ەكپىنىن ارتتىرىپ وتىر, مۇنداي باعىت بولاشاقتا دا تومەندەمەك ەمەس. وفيتسەرلەر مەن كەلىسىمشارت قىزمەتكەرلەرىنىڭ جايلى دا ءساندى پاتەرلەرمەن قامتاماسىز ەتىلۋى كۇننەن-كۇنگە ارتا تۇسۋدە. شەن تاققان قىزمەتكەرلەر جانعا جايلى بارلىق جاعدايى جاسالعان اسكەري قالاشىقتاردا وتباسىلارىمەن بىرگە تۇرۋدا.
شەكارا قىزمەتى اسكەري قالاشىقتار سوعۋدا دامىعان ەلدەردىڭ تاجىريبەسىن باتىل قولدانۋدا. مۇندا اسكەري بولىمدەرگە قاجەتتى بارلىق جاعدايلار, ونىڭ ىشىندە الەۋمەتتىك-تۇرمىستىق جاعدايدىڭ بولۋى قاتاڭ ساقتالادى. سوندا عانا شەكاراشى ەلىمىزدىڭ قاي تۇكپىرىندە قىزمەت اتقارسا دا الەۋمەتتىك-تۇرمىستىق جاعىنان ەشقانداي كەمشىلىك كورمەيتىن بولادى.
ن.جولامانوۆ پاتەر كىلتتەرىن تاپسىرا تۇرىپ, شەكاراشىلار مەن ولاردىڭ وتباسى مۇشەلەرىن جاڭا قونىستارىمەن قۇتتىقتادى, ولارعا مىقتى دەنساۋلىق پەن باقىت, قىزمەتتەرىنە تابىس تىلەدى.