«قازترانسگاز ايماق» اق-تىڭ قىزىلورداداعى بولىمشەسى تاريفتىك سمەتا شىعىندارى بابىن بۇزعانى جانە بەكىتىلگەن ءتاريفتى قولدانباعانى ءۇشىن تۇتىنۋشىلارعا 1,5 ميلليارد تەڭگەدەن اسا قاراجاتتى قايتارۋعا مىندەتتەلدى, دەپ حابارلايدى Egemen.kz ۇلتتىق ەكونوميكا مينيسترلىگىنىڭ ءباسپاسوز قىزمەتىنە سىلتەمە جاساپ.
«2020 جىل بويىنشا تاريفتىك سمەتانىڭ ورىندالۋىنا جۇرگىزىلگەن تالداۋ شەڭبەرىندە, قازاقستان رەسپۋبليكاسى ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتىنىڭ قىزىلوردا وبلىسى بويىنشا دەپارتامەنتى «قازترانسگاز ايماق» اق-نىڭ قىزىلورداداعى بولىمشەسىندە تاريفتىك سمەتا شىعىندارى بابىن بۇزۋ جانە بەكىتىلگەن ءتاريفتى قولدانباۋ دەرەگى انىقتالدى.
«ناتيجەسىندە «قازترانسگاز ايماق»اق بيىل 1 تامىزدان باستاپ تاۋارلىق گازدى گاز تاراتۋشى جۇيەلەرى ارقىلى تاسىمالداۋ قىزمەتىنە ققس-سىز 1000 تەكشە مەترگە 3320,45 تەڭگە مولشەرىندە نەمەسە بەكىتىلگەن تاريفكە قاراعاندا 44,1 پايىزعا تومەندەتىلىپ 1 جىلعا ۋاقىتشا وتەمدىك تاريف ەنگىزۋ جولىمەن تۇتىنۋشىلارعا 1 548 508 389 تەڭگە زالال سوماسىن قايتارادى», دەلىنگەن مينيسترلىك حابارلاماسىندا.
بۇرىن ققس-سىز مىڭ تەكشە مەتر ءۇشىن 5941,35 تەڭگە ءتاريفى قولدانىلعان. سونداي-اق, كاسىپورىننىڭ بەكىتىلگەن ءتاريفتى 44,1 پايىزعا تومەندەتۋ مۇمكىندىگى بار.
جاڭا ەرەجەلەر 1 تامىزدان باستاپ كۇشىنە ەنەدى.