توكيودا بەلدەسەتىن بالۋاندار

قازاقستاننىڭ گرەك-ريم كۇرەسى شەبەرلەرىنىڭ توكيوعا تولىق قۇراممەن بارۋىنا بارلىق مۇمكىندىگى بولدى. ولاي دەۋگە نەگىز, وليمپيا ويىندارىنىڭ جولدامالارى ساراپقا سالىنعان ەكى بىردەي ءدۇبىرلى دودا ءوز جەرىمىزدە وتكەن ەدى. العاشقىسى – 2019 جىلى نۇر-سۇلتاندا جالاۋى جەلبىرەگەن الەم چەمپيوناتى. ەكىنشىسى – الماتىدا شىمىلدىعى تۇرىلگەن ازيا مەملەكەتتەرى اراسىنداعى ليتسەنزيالىق تۋرنير. وكىنىشكە قاراي, جەرلەستەرىمىز ءوز مۇمكىندىكتەرىن پايدالانا الماي, نەبارى ءۇش جولدامانى قاناعات تۇتتى. ارينە, بۇل كوڭىل كونشىتەرلىك كورسەتكىش ەمەس. سودان ۇلتتىق قۇراما باپكەرلەرى «وليمپياداعا كىمدەردى اپارساق؟» دەپ ءبىراز باس قاتىردى. ماسەلەن, 60 كيلو سالماق دارەجەسىندە ەكى بىردەي مىقتى سپورتشى بار. ولار – مەيرامبەك ايناعۇلوۆ پەن ايدوس سۇلتانعالي. 27 جاستاعى مەيرامبەك. ول الەم چەمپيوناتىندا ەكى رەت جەڭىس تۇعىرىنا كوتەرىلدى. 2017 جىلى پاريدجە كۇمىس السا, 2019 جىلى نۇر-سۇلتاندا قولا مەدالدى موينىنا ءىلدى. ودان بولەك, ازيا ويىندارى مەن قۇرلىق بىرىنشىلىگىندە جۇلدەگەرلەر قاتارىنا قوسىلدى. 25 جاستاعى ايدوس 2018 جىلى بۋداپەشتتەگى دۇنيەجۇزىلىك دودادا ۇزدىك ۇشتىكتى قورىتىندىلادى. دەسەك تە بۇل جولى تاڭداۋ ايناعۇلوۆقا ءتۇستى. سەبەبى مەيرامبەك سوڭعى كەزدەرى حالىقارالىق دودالاردا جاپ-جاقسى كۇرەسىپ ءجۇر. 77 كيلو سالماق دارەجەسىندەگى جاعداي دا ءدال سولاي. وسىدان ەكى جىل بۇرىن وتكەن الەم چەمپيوناتىندا اسحات دىلمۇحامەدوۆ جەڭىس تۇعىرىنا كوتەرىلە الماعانىمەن, شيرەك فينالعا دەيىن جەتىپ, جولداماعا قول جەتكىزدى. ونىڭ نۇر-سۇلتانداعى ونەرى جاقسى اسەر قالدىردى. اسحاتتىڭ ايتۋلى جارىس بارىسىندا وليمپيا ويىندارى مەن الەم چەمپيوناتىن ەكى رەتتەن ۇتقان رەسەيلىك رومان ۆلاسوۆتى قاپى قالدىرۋى جوعارىداعى ءسوزىمىزدىڭ ايقىن دالەلى. دەسەك تە بۇل سالماقتا دەمەۋ جادىراەۆ تا بار. ول – 2017 جىلى پاريجدە وتكەن الەم چەمپيوناتىنىڭ كۇمىس جۇلدەگەرى. اسحات 34 جاستا, دەمەۋ 31-دە. سودان ماماندار ەكەۋىن ءتۇرلى جارىستارعا اپارىپ, قايسى جاقسى ناتيجە كورسەتسە, سونى توكيوعا اپارامىز دەگەن شەشىمگە كەلدى. بۇل رەتتە جادىراەۆتىڭ جولى بولدى. ول شەت مەملەكەتتەردە وتكەن تۋرنيرلەردە باستى قارسىلاسىنا قاراعاندا ءتاۋىر كۇرەستى. سول سەبەپتى دە باس باپكەردىڭ تاڭداۋى دەمەۋگە ءتۇستى. ال 87 كيلو سالماقتا نۇر­سۇلتان تۇرسىنوۆتىڭ وليمپيا ويىن­دارىنا قاتىسۋىنا ەشكىم قارسىلىق بىلدىرمەدى. ويتكەنى بۇل سالماقتا باسەكەلەستىك دەڭگەيى تومەن. بىرەر جىل ازامات قۇستىباەۆ ءتاۋىر ناتيجە كورسەتىپ, قۇرلىقتىق دەڭگەيدەگى دودالاردا جۇلدە العان ەدى. الايدا ءتورت جىلدان كەيىن بوز كىلەمگە قايتا ورالعان ونى تۇرسىنوۆ بىلتىر ەل بىرىنشىلىگىنىڭ فينالىندا ۇتىپ, ەلىشىلىك جارىستاردا وزىنە تەڭ كەلەر ەشكىم جوق ەكەنىن دالەلدەدى. ودان كەيىنگى باسەكەلەردە دە 30 جاستاعى نۇرسۇلتان ءبىراز بەلەستەردى باعىندىردى. مىنە, توكيو تورىندە وسى ءۇش بالۋانىمىز ونەر كورسەتەدى. گرەك-ريم كۇرەسىنەن قازاقستان قۇراماسى سوڭعى رەت 1996 جىلى اتلانتا وليمپياداسىندا التىن العان ەدى. سودان بەرگى كەزەڭدە گەورگي تسۋر­تسۋميا (2004 جىلى, كۇمىس), مكحي­تار مانۋكيان (2004 جىلى, قولا), نۇر­باقىت تەڭىزباەۆ (2008 جىلى, كۇمىس) جانە دانيال گادجيەۆ (2012 جىلى, قولا) جۇلدەگەرلەر قاتارىنا قوسىلدى. بىراق ولاردىڭ ەشقايسىسى دا يۋري مەلنيچەنكونىڭ ەرلىگىن قاي­تالاي العان جوق. بالكىم, وسى جولى ءۇش قانداسىمىزدىڭ بىرەۋى قازاق ەلىنىڭ ءانۇرانىن شىرقاتار؟!