قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ءبىلىم بەرۋ نىساندارىنىڭ قاۋىپسىزدىگىن قامتاماسىز ەتۋ ماسەلەلەرى قارالدى, دەپ حابارلايدى Egemen.kz.
ءبىلىم جانە عىلىم ءمينيسترى اسحات ايماعامبەتوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ىشكى ىستەر ءمينيسترى ەرلان تۇرعىمباەۆ, تۇركىستان وبلىسىنىڭ اكىمى ومىرزاق شوكەەۆ, الماتى وبلىسىنىڭ اكىمى اماندىق باتالوۆ بايانداما جاسادى.
قازاقستاندا مەكتەپتەردە تەكسەرىس جۇرگىزۋ بارىسىندا تەرروريزمگە قارسى قاۋىپسىزدىكتى بۇزۋ فاكتىلەرى انىقتالدى. وقۋ ورىندارىن مامانداندىرىلعان كۇزەتپەن قامتاماسىز ەتۋ, تۋرنيكەتتەر, «دابىل تۇيمەلەرى» مەن كامەرالار ورناتۋ جۇمىستارى جەتكىلىكسىز دەڭگەيدە ۇيىمداستىرىلعان.
كاسىبي كۇزەتپەن قامتاماسىز ەتىلگەن مەكتەپتەردىڭ ەڭ كوبى نۇر-سۇلتان جانە الماتى قالالارىندا, قاراعاندى, شىعىس قازاقستان, سولتۇستىك قازاقستان وبلىستارىندا. شىعىس قازاقستان وبلىسىندا مەكتەپتەردەگى بارلىق بەينەباقىلاۋ كامەرالارى بەلگىلەنگەن تالاپتارعا تولىق سايكەس كەلەدى.
ء«بىلىم بەرۋ وبەكتىلەرىندە قولايلى ءارى قاۋىپسىز ورتا قالىپتاستىرۋ – باسىم مىندەتتەردىڭ ءبىرى. وقۋ ورىندارىنىڭ قاۋىپسىزدىگىن قامتاماسىز ەتۋ جۇمىسىن ايتارلىقتاي جانداندىرۋ قاجەت. جەرگىلىكتى جەرلەردە بالالارعا قاتىستى جانە بالالار اراسىندا قۇقىق بۇزۋشىلىقتاردىڭ الدىن الۋ بويىنشا سالاارالىق ۇيلەستىرۋدى كۇشەيتۋ تالاپ ەتىلەدى», دەدى ا. مامين.
ۇكىمەت باسشىسى وڭىرلەردىڭ اكىمدىكتەرىنە جاڭا وقۋ جىلىنىڭ باستالۋىنا دەيىن ءبىلىم بەرۋ ۇيىمدارىن ماتەريالدىق-تەحنيكالىق قاۋىپسىزدىك قۇرالدارىمەن: ىشكى ىستەر ورگاندارىنىڭ جەدەل باسقارۋ ورتالىعىنا شىعاتىن بەينەباقىلاۋ جۇيەلەرىمەن, مامانداندىرىلعان كۇزەتپەن, تۋرنيكەتتەرمەن جانە «دابىل تۇيمەلەرىمەن» قامتاماسىز ەتۋدى تاپسىردى.
ءبىلىم مينيسترلىگىنە مۇددەلى مەملەكەتتىك ورگاندارمەن بىرلەسىپ, وسى جىلعى 10 شىلدەگە دەيىن ءبىلىم بەرۋ ۇيىمدارىندا بالالاردىڭ قاۋىپسىزدىگىن قامتاماسىز ەتۋ جونىندەگى جول كارتاسىن بەكىتۋ تاپسىرىلدى.
ءبىلىم, مادەنيەت, دەنساۋلىق ساقتاۋ, ىشكى ىستەر مينيسترلىكتەرىنە بيىلعى 20 شىلدەگە دەيىن تەرروريستىك تۇرعىدان وسال ۆەدومستۆولىق وبەكتىلەردىڭ تەرروريزمگە قارسى قورعالۋىن ۇيىمداستىرۋ جونىندەگى نۇسقاۋلىقتى بەكىتۋ تاپسىرىلدى.
ءبىلىم, ىشكى ىستەر, توتەنشە جاعدايلار مينيسترلىكتەرىنە جانە وڭىرلەردىڭ اكىمدىكتەرىنە بيىلعى شىلدە ايىنىڭ سوڭىنا دەيىن توتەنشە جاعدايلار تۋىنداعان كەزدە پەرسونال مەن وقۋشىلاردىڭ ءىس-قيمىل الگوريتمىن بەكىتۋ, ودان ءارى وقۋ ورىندارىندا تەرروريزمگە قارسى وقۋ-جاتتىعۋلاردى تۇراقتى نەگىزدە وتكىزۋ تاپسىرىلدى.
پرەمەر-مينيستر اكىمدىكتەرگە دەۆيانتتى مىنەز-ق ۇلىقتى بالالارمەن جۇرگىزىلەتىن جۇمىستا مەكتەپ پسيحولوگتارى مەن كامەلەتكە تولماعاندار ءىسى جونىندەگى ينسپەكتورلار جۇمىسىن ۇيلەستىرۋدى كۇشەيتۋدى تاپسىردى.