ەلوردادا بۇقارالىق اقپارات قۇرالدارى اراسىندا شاعىن فۋتبولدان رەسپۋبليكالىق جارىس وتەدى, دەپ حابارلايدى Egemen.kz.
قر اقپارات جانە قوعامدىق دامۋ مينيسترلىگىنىڭ قولداۋىمەن باق قىزمەتكەرلەرىنىڭ كاسىبي مەرەكەسى قارساڭىندا 27 ماۋسىم كۇنى نۇر-سۇلتان قالاسىندا ۇلتتىق سپورت جۋرناليستيكاسىنىڭ نەگىزىن قالاۋشى سەيداحمەت بەردىقۇلدىڭ قۇرمەتىنە ارنالعان شاعىن فۋتبولدان رەسپۋبليكالىق تۋرنير باستالادى.
«اتاۋلى تۋرنير العاش جالاۋىن كوتەرگەن 1994 جىلدان بەرى جىل سايىن ۇيىمداستىرىلاتىن جانە باق وكىلدەرى تاعاتسىزدانا كۇتەتىن دوپ دوداسىنا اينالعان ەدى. الايدا, بىلتىر ەلدە ورىن العان وتە قيىن ەپيدەميولوگيالىق احۋالعا بايلانىستى ونى وتكىزۋ مۇمكىن بولمادى.
سپورتتى جانىنا سەرىك ەتكەن جۋرناليستەر قاۋىمى اسىعا كۇتكەن اياق دوپ جارىسىن بيىل قايتا جالعاپ وتىرمىز. بۇنداي ءىس-شارالار وتاندىق اقپارات سالاسىنىڭ دامۋىنا ۇلەس قوسقان بەلگىلى ەسىمدەردى ەسكە الۋمەن قاتار, قوعامعا سالاۋاتتى ءومىر سالتىن ناسيحاتتاۋدىڭ دا ايقىن ۇلگىسى.
سپورت – جان مەن ءتاننىڭ ساۋلىعى, دەنساۋلىقتىڭ كەپىلى!
تۋرنيرگە قاتىسۋشى بارشا كومانداعا ناتيجەلى دە تارتىستى ويىن, جۇلدەلى دە جارقىن جەڭىس تىلەيمىن!», دەپ جازدى قر اقپارات جانە قوعامدىق دامۋ ءمينيسترى ايدا بالاەۆا Facebook پاراقشاسىندا.