بۇگىن قازاقستاندىق ءتارتىپ ساقشىلارى وزدەرىنىڭ كاسىبي مەرەكەلەرى – پوليتسيا كۇنىن اتاپ وتۋدە, دەپ حابارلايدى Egemen.kz.
ىشكى ىستەر ءمينيسترى ەرلان تۇرعىمباەۆ ەلىمىزدىڭ بارلىق پوليتسيا قىزمەتكەرلەرىن كاسىبي مەرەكەسىمەن قۇتتىقتادى.
«قۇرمەتتى ارداگەرلەر, ارىپتەستەر! بارشاڭىزدى قازاقستان پوليتسياسى كۇنىمەن شىن جۇرەكتەن قۇتتىقتايمىن. تاۋەلسىزدىك العالى ىشكى ىستەر ورگاندارىنىڭ قىزمەتكەرلەرى ەلىمىزدە قوعامدىق ءتارتىپتى قامتاماسىز ەتىپ, ازاماتتاردىڭ قۇقىقتارىن ساقتاۋ جولىندا قىزمەت ەتۋدە. مەملەكەت باسشىسى ىشكى ىستەر ورگاندارىنىڭ جۇمىسىنا ەرەكشە كوڭىل ءبولىپ وتىر.
حالىقتىڭ پوليتسياعا سەنىمىن ارتتىرۋ ءۇشىن, سەرۆيستىك مودەلگە كوشۋ جالعاسۋدا. ۆەدومستۆولىق ءبىلىم بەرۋ جۇيەسىنە رەفورما جۇرگىزىلدى. قىزمەتكەرلەردىڭ الەۋمەتتىك جانە ماتەريالدىق جاعدايى جاقساردى. جالاقى كوتەرىلىپ, تۇرعىن ۇيگە كومپەنساتسيا الاتىن قىزمەتكەرلەر سانى ءوستى. بۇل – پوليتسيا قىزمەتكەرلەرىنەن جوعارى جاۋاپكەرشىلىكتى جانە قىزمەتتىك مىندەتتەرىن ادال اتقارۋدى تالاپ ەتەدى.
توتەنشە جاعداي مەن كارانتين كەزىندە قىزمەتكەرلەر تەك وزدەرىنىڭ تىكەلەي مىندەتىن اتقارىپ قانا قويماي, ادامداردىڭ ءومىرى مەن دەنساۋلىعىن قورعاۋ ءۇشىن دارىگەرلەرمەن بىرگە الدىڭعى شەپتە ءجۇردى. ەلدەگى قاۋىپسىزدىكتى قامتاماسىز ەتۋگە بار كۇشىن سالعان قىزمەتكەرلەردىڭ ەڭبەگى جوعارى باعالاندى. تاۋەلسىزدىك العاننان باستاپ, 1,5 مىڭ قىزمەتكەر مەملەكەتتىك ناگرادامەن ماراپاتتالدى. وكىنىشكە وراي, تاۋەلسىزدىك جىلدارى قىزمەتتىك بورىشىن ورىنداۋ كەزىندە 802 قىزمەتكەر قازا تاۋىپ, 2650 ادام جاراقات الدى.
ءبىز انتقا ادال بولعان ارىپتەستەردى ەشقاشان ۇمىتپايمىز. باتىرلارىمىزدىڭ رۋحىنا ماڭگىلىك تاعزىم! ارداگەرلەرىمىزدىڭ دە پوليتسيانىڭ دامۋىنا قوسقان ەڭبەگى ەرەكشە. جاس قىزمەتكەرلەردى تاربيەلەپ, جاڭا فورماتتاعى پوليتسيانىڭ بەينەسىن قالىپتاستىرۋعا قوسقان ۇلەسى ءۇشىن ۇلكەن العىس بىلدىرەمىن. قۇرمەتتى ارداگەرلەر جانە ارىپتەستەر! بۇگىنگى كاسىبي مەرەكە كۇنى سىزدەردىڭ وتباسىلارىڭىزعا زور دەنساۋلىق, باقىت پەن بايلىق, وتانىمىز – قازاقستان رەسپۋبليكاسىن وركەندەتۋ جولىنداعى قىزمەتتەرىڭىزگە تابىس تىلەيمىن!», دەدى ىشكى ىستەر ءمينيسترى ەرلان تۇرعىمباەۆ قۇتتىقتاۋ سوزىندە.