«اباي-ۆەرن» ۇتقىرلىق ءبىلىم بەرۋ باعدارلاماسىنا قاتىسۋ ءۇشىن وتىنىشتەردى قابىلداۋ باستالدى, دەپ حابارلايدى Egemen.kz بعم ءباسپاسوز قىزمەتىنە سىلتەمە جاساپ.
باعدارلاما بويىنشا 30-دان استام قازاقستاندىق ماگيسترانت پەن دوكتورانت فرانتسيادا تەگىن ءبىلىم الا الادى. ۇتقىرلىق باعدارلاماسى كوروناۆيرۋستىق پاندەمياعا بايلانىستى موراتوري ەنگىزىلگەننەن كەيىن ءبىر جىل وتكەن سوڭ قايتا جۇزەگە اسىرىلا باستادى.
ءبىلىم جانە عىلىم ءمينيسترى اسحات ايماعامبەتوۆ پەن فرانتسيانىڭ قازاقستانداعى ەلشىسى ديدە كانەسس فرانكو-قازاقستاندىق ستيپەنديا تۋرالى كەلىسىمگە وزگەرىستەر ەنگىزۋ تۋرالى حاتتاماعا قول قويدى. 2021-2022 وقۋ جىلىندا ەكىنشى كۋرستىڭ 30 ماگيسترانتى جانە قازاقستان مەن فرانتسياداعى عىلىمي جەتەكشىلەرمەن بىرلەسىپ ديسسەرتاتسيا دايىندايتىن 5 دوكتورانت «اباي-ۆەرن» ستيپەندياسىنىڭ يەگەرى اتانا الادى.
«اباي-ۆەرن» ستيپەندياسى ماگيسترانتتار مەن دوكتورانتتارعا فرانتسۋز جانە اعىلشىن تىلدەرىندە فرانتسيا ۋنيۆەرسيتەتتەرىندە وقۋ ءۇشىن بەرىلەدى. ۇمىتكەرلەردىڭ فرانتسۋز جوعارى وقۋ ورنىنا نەمەسە عىلىمي-زەرتتەۋ ورتالىعىنا ماگيستراتۋرا مەن دوكتورانتۋرا باعدارلامالارى بويىنشا وقۋعا الدىن الا قابىلدانعاندىعى تۋرالى راستاۋ حاتى بولۋى ءتيىس», دەپ اتاپ ءوتتى قر بعم حالىقارالىق ىنتىماقتاستىق دەپارتامەنتى ديرەكتورىنىڭ م.ا. ەلميرا اسان.
«اباي-ۆەرن» ستيپەندياسىن جەڭىپ العان ماگيسترانتتارعا ۇلتتىق بانك باعامى بويىنشا اي سايىن 800 ەۆرو, دوكتورانتتارعا 1200 ەۆرو مولشەرىندە ستيپەنديا تولەنەدى. سونداي-اق ستيپەندياتتار فرانتسياداعى ۋنيۆەرسيتەت جاتاقحاناسىندا ورىن الۋعا ارتىقشىلىقتى قۇقىقتارعا يە بولىپ, ۇزاق مەرزىمدى ستۋدەنتتىك ۆيزا جانە فرانتسۋزدىق الەۋمەتتىك ساقتاندىرۋ جۇيەسىنە تەگىن تىركەلە الادى. «اباي-ۆەرن» اكادەميالىق ۇتقىرلىق باعدارلاماسى بويىنشا قۇجاتتاردى قابىلداۋ 2021 جىلدىڭ 4 شىلدەسىنە دەيىن جالعاسادى. كانديداتتاردى ىرىكتەۋدى فرانكو-قازاقستاندىق تاۋەلسىز كوميسسيا جۇرگىزەدى.
«اباي-ۆەرن» – بۇل قر ءبىلىم جانە عىلىم مينيسترلىگى مەن فرانتسيانىڭ ەۋروپا جانە سىرتقى ىستەر مينيسترلىگىنىڭ بىرلەسكەن ستيپەنديالىق باعدارلاماسى. كەلىسىمگە قول قويىلعان كەزدەن باستاپ 158 قازاقستاندىق ماگيسترانت پەن دوكتورانت بەدەلدى «اباي-ۆەرن» حالىقارالىق ستيپەندياسىنىڭ يەگەرى اتانعان.