بۇگىن تۇركيانىڭ ىستانبۇل قالاسىندا گرەك-ريم كۇرەسىنەن Vehbi Emre&Hamit Kaplan مەموريالى وتەدى. بۇل تۋرنيردە قازاقستاننىڭ جەتى بالۋانى باق سىنايدى.
38-مارتە جالاۋى جەلبىرەگەلى وتىرعان جارىسقا جەرلەستەرىمىز سان رەت قاتىسقان. سولاردىڭ اراسىندا جەڭىس تۇعىرىنا كوتەرىلگەن ساڭلاقتار دا از ەمەس. بۇل جولى ۇلتتىق كوماندامىزدىڭ باس باپكەرى باقتيار بايسەيىتوۆ ايدوس سۇلتانعالي, مەيرامبەك ايناعۇلوۆ (60 كيلو), اسحات دىلمۇحامەدوۆ, دەمەۋ جادىراەۆ, تەمىرلان شادۋكاەۆ (77 كيلو), نۇرسۇلتان تۇرسىنوۆ جانە ازامات قۇستىباەۆ (87 كيلو) سىندى ساڭلاقتارعا سەنىم ارتىپ وتىر. ولاردىڭ بارلىعى دا ۇلكەن سىناقتاردان ءوتىپ, اسا ءىرى حالىقارالىق جارىستاردا اتوي سالىپ جۇرگەن سپورتشىلار ەكەنىن جانكۇيەرلەر جاقسى بىلەدى.
ەستەرىڭىزگە سالا كەتەيىك, قازاقستاننىڭ گرەك-ريم كۇرەسى شەبەرلەرى ءدال وسى سالماق دارەجەسىندە وليمپيادالىق ليتسەنزياعا يەلىك ەتكەن بولاتىن. بۇل ءبىزدىڭ جىگىتتەر ءۇشىن سوڭعى سىناق. انادولى ەلىندەگى سايىستا ەڭ جاقسى ناتيجە كورسەتكەن بالۋاندار كەلەسى ايدا توكيودا الاۋى تۇتاناتىن جاھاندىق دودادا باق سىناۋ قۇرمەتىنە بولەنەدى.