فۋتبولدان ەۋروپا بىرىنشىلىگىنىڭ توپتىق ءتۋرنيرىنىڭ ەكىنشى تۋر ويىندارى باستالدى. سەيسەنبى كۇنى كورەرمەندەر فينليانديا مەن رەسەي جانە تۇركيا مەن ۋەلس قۇرامالارى اراسىنداعى تارتىستى تاماشالاسا, كەشە يتاليا مەن شۆەيتساريانىڭ ويىنشىلارى جارىس كورىگىن قىزدىرىپ, ورەلى ونەرلەرىمەن سپورتسۇيەر قاۋىمنىڭ سۇيىسپەنشىلىگىنە بولەندى.
سانكت-پەتەربۋرگتەگى «گازپروم ارەناداعى» سايىستى 24 540 كورەرمەن تاماشالادى. ۆ توبىنداعى باسەكەنىڭ باستالعانىنا نەبارى ەكى مينۋتتاي ۋاقىت وتكەندە, يوەل پوحيانپالونىڭ باسپەن ۇرعان دوبى قاقپا تورىنان تابىلدى. الايدا تورەشى VAR جۇيەسىنە سۇيەنە وتىرىپ, دوپتىڭ وفسايدتان سوعىلعانىن انىقتادى. وسىدان كەيىن-اق رەسەيلىكتەر قارقىنىن كۇرت كۇشەيتتى. العاشقى تۋردا بەلگيادان ويسىراي ۇتىلعان ولار بۇل جولى قالاي دا ءۇش ۇپاي ولجالاۋدى كوزدەدى. سول سەبەپتى دە دامىلسىز شابۋىلدادى. دەسەك تە جانكۇيەرلەر توردا تۋلاپ جاتقان دوپتى تەك ۇزىلىسكە شىعار ساتتە عانا كورە الدى. بۇل گولدىڭ اۆتورى – الەكسەي ميرانچۋك.
ەكىنشى كەزەڭدە رەسەي قۇراماسىنىڭ ساپىنداعى الەكساندر گولوۆين, ريفات جەمالەتدينوۆ جانە ارتەم دزيۋبانىڭ تەپكەن دوپتارى قاۋىپتى بولدى. سۋومي ەلىنىڭ سايىپقىراندارى اراسىندا تەەمۋ پۋككي وتە بەلسەندى وينادى. بىراق ولاردىڭ ەشقايسىسى تابلوداعى ەسەپتى وزگەرتە العان جوق – 0:1.
باكۋدەگى «وليمپيسكي» ستاديونىندا تۇركيا مەن ۋەلس شەبەرلىك بايقاستى. تۇساۋكەسەر كەزدەسۋىندە يتاليالىقتاردان وڭباي جەڭىلگەن انادولى ەلىنىڭ وكىلدەرى بۇل باسەكەدە بارىن سالادى دەپ ۇمىتتەندىك. ويتكەنى ءوز ويىنشىلارىنا قولداۋ كورسەتۋ ماقساتىندا ىرگەدەگى تۇركيادان كاسپي تەڭىزى جاعالاۋىنا سان مىڭ جانكۇيەر ارنايى ات باسىن بۇردى. جانە دە ازەربايجان حالقى دا ءوز باۋىرلاستارىنىڭ شاشباۋىن كوتەرەدى. ال جانكۇيەرلەردىڭ قولداۋى قاي كەزدە دە كوماندانى ەرەكشە جىگەرلەندىرىپ, قاناتتاندىراتىنى انىق.
ءححى عاسىردىڭ العاشقى ونجىلدىعىندا شەنول گيۋنەش پەن فاتيح تەريم سىندى بىلىكتى باپكەرلەر تۇركيا قۇراماسىنىڭ تىزگىنىن ۇستاعانى بەلگىلى. مايتالمان مامانداردىڭ جەتەكشىلىگىمەن ايتۋلى مەملەكەتتىڭ اياقدوپ شەبەرلەرى الەم مەن ەۋروپا چەمپيوناتى جانە كونفەدەراتسيا كۋبوگىندا تورتكۇل دۇنيەنى تامساندىرىپ, قولا مەدالدى ولجالادى. سول كەزدەرى حاھان شۇكىر, حاسان شاش, ريۋشتيۋ رەچبەر, بيۋلەنت قورقىماز, يىلدىراي باستۇرىك, ءۇمىت داۆالا, يلحان ماسىز جانە تاعى باسقا ويىنشىلاردىڭ ەسىمدەرىن ەستييار بالادان, ەڭكەيگەن قارتقا دەيىن جاتقا بىلەتىن. بۇل جولى دا تىزگىن داڭقتى گيۋنەشتىڭ قولىندا ەدى. بىراق ءبىز مۇلدە باسقا تۇركيانى كوردىك. ايگىلى كوماندانىڭ قاڭقاسى دا قالماپتى. ۋەلسكە قارسى ويىندا سوعان انىق كوز جەتكىزدىك. تۇرىكتەر نە ءبىر جاقسى شابۋىل, نە ءبىر كوڭىلگە قونىمدى كومبيناتسيالار ۇيىمداستىرا المادى. ناتيجەسىندە, ولار تاعى دا جەڭىلىستىڭ كەرمەك ءدامىن تاتتى. ەسەپ – 0:2. بۇل گولداردىڭ اۆتورلارى – اارون رەمسي (42-مينۋت) مەن تايلەر روبەرتس (92-مينۋت).
ا توبىندا يتاليا قۇراماسى جەكە-دارا كوش باستادى. العاشقى تۋردا تۇركيانى 3:0 ەسەبىمەن تىزە بۇكتىرگەن ولار كەلەسى كەزدەسۋدە وتە كەرەمەت ويىن ورنەگىن كورسەتىپ, ءىرى ەسەپپەن جەڭىسكە جەتتى. بۇل جولى اپەننين تۇبەگىنىڭ تۇلەكتەرى شۆەيتساريا فۋتبولشىلارىنىڭ تاس-تالقانىن شىعاردى. تابلوداعى ەسەپ تاعى دا – 3:0.
ريمدە وتكەن ماتچتىڭ 19-مينۋتىندا دجوردجو كەلليني ەسەپ اشتى. بىراق سول ەپيزودتى قايتالاپ كورگەن رەسەيلىك تورەشى سەرگەي كاراسەۆ سوعىلعان گولدى ەسەپكە المادى. دەسەك تە ودان كەيىن دە الاڭ يەلەرى قارقىنىن باسەڭدەتكەن جوق. جانۇشىرا العا ۇمتىلعان يتاليالىقتار كوزدەگەن ماقساتتارىنا قول جەتكىزدى. باسەكەنىڭ 26 جانە 52-مينۋتتارىندا مانۋەل لوكاتەللي ەكى مارتە نىسانانى ءدال كوزدەسە, 89-مينۋتتا چيرو يمموبيلە كەزدەسۋدىڭ سوڭعى نۇكتەسىن قويدى.