«قازاقستان» تەلەراديوكورپوراتسياسى قازاقستاندىق جوعارى وقۋ ورىندارىنداعى جۋرناليستيكا فاكۋلتەتىنىڭ II, III, IV كۋرس ستۋدەنتتەرى اراسىندا قازاق تەلەۆيزياسىنىڭ ارداگەرى نۇرتىلەۋ يمانعالي ۇلى اتىنداعى ستيپەندياعا بايقاۋ جاريالادى, دەپ حابارلايدى Egemen.kz.
«نۇرتىلەۋ يمانعالي ۇلى – ءوزىنىڭ ەفيردەگى ۇلگىسىمەن قازاق تەلەۆيزياسىنىڭ تۇتاس ءبىر بۋىنىن تاربيەلەگەن تۇلعا. ءبىزدىڭ ماقساتىمىز – وسى ساباقتاستىقتى جالعاۋ, تەلەۆيزيادا نۇرتىلەۋ يمانعالي ۇلىنىڭ ءىزباسارلارىن دايىنداۋ, ەسىمى مەن شىعارماشىلىعىن كەڭىنەن ناسيحاتتاۋ. ەكىنشىدەن, بۇل بولاشاق جۋرناليستەردىڭ شىعارماشىلىق شەبەرلىگىن شىڭداۋعا كورسەتكەن قولداۋىمىز», دەيدى «قازاقستان» رترك» اق باسقارما توراعاسى ءلاززات تانىسباي.
ۇمىتكەر ن.يمانعالي ۇلىنىڭ تەلەۆيزياداعى تۇلعاسى جايلى بەينەماتەريال ازىرلەۋى ءتيىس. ماتەريالدار قازاق تىلىندە قابىلدانادى. گرانت يەگەرلەرىن (ەكى جەڭىمپاز) «قازاقستان» تەلەراديوكورپوراتسياسىنىڭ قىزمەتكەرلەرىنەن قۇرالعان ارنايى كوميسسيا انىقتايدى.
ستيپەنديا ءار جەڭىمپازعا 2021-2022 وقۋ جىلىنا بەرىلەدى. جۇمىستار 2021 جىلعى 28 ماۋسىم – 28 تامىز ارالىعىندا baiqau@qazaqstan.tv ەلەكتروندى پوشتاسى ارقىلى قابىلدانادى.