قر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ «لوكوموتيۆ قۇراستىرۋ زاۋىتى» اق باسشىلىعىمەن كوشپەلى كەزدەسۋ وتكىزدى, دەپ حابارلايدى Egemen.kz.
زاۋىت جەتەكشىلىگى يدم باسشىسىن كاسىپورىننىڭ نەگىزگى وندىرىستىك تسەحتارىنىڭ جۇمىسىمەن تانىستىردى. ايتا كەتەيىك, مۇندا تارتقىش جىلجىمالى قۇرامنىڭ جىلىنا 100 بىرلىگى شىعارىلادى.
General Electric Transportation كومپانياسىنىڭ ليتسەنزياسى مەن تەحنولوگياسى بويىنشا جۇك, جولاۋشىلار جانە مانەۆرلىك تەپلوۆوزدار ءوندىرىسى 2010 جىلدان باستالعان بولاتىن.
بۇگىنگى كۇنى زاۋىتتا جۇك (تە33اس), جولاۋشىلار (تەپ33ا) جانە مانەۆرلىك (تەم11ا) تەپلوۆوزدارى شىعارىلادى.
وتاندىق ءونىمنىڭ نەگىزگى ارتىقشىلىقتارىنا كەلەر بولساق, قىزمەت ەتۋ مەرزىمى مەن جوندەۋ ارالىق كەزەنىنىڭ ۇزاقتىعى, ورناتىلعان وزىندىك دياگنوستيكالاۋ جۇيەسى جانە بوس جۇرىستەگى ديزەل وتىنىنىڭ از شىعىنى بولىپ تابىلادى.
كاسىپورىن ىسكە قوسىلعان ساتتەن باستاپ 416 تەپلوۆوز وندىرىلگەن. ونىڭ 35-ءى تاجىكستانعا, ازىربايجانعا, تۇركىمەنستانعا, ۋكرايناعا, قىرعىزستان مەن مولدوۆاعا ەكسپورتقا شىعارىلدى.
كەزدەسۋ بارىسىندا «لوكوموتيۆ قۇراستىرۋ زاۋىتى» اق پرەزيدەنتى مارات تىلەۋباەۆ بارلىق لوكوموتيۆتەردىڭ تەحنيكالىق سيپاتتامالار مەن قاۋىپسىزدىككە سايكەستىگىن تەكسەرۋ مەن سىناۋدىڭ تولىق تسيكلىنان ءوتىپ جاتقانىن اتاپ ءوتتى. ءوندىرىس وشاعىندا 570-تەن استام جۇمىس ورنى اشىلعان.
جالپى, 2010 جىلدان باستاپ 11 مىڭنان استام توراپ پەن بولشەك وقشاۋلاندىرىلدى. بۇل قۇرامداس بولىكتەردىڭ جەرگىلىكتى قامتۋدىڭ 74% -دان استام دەڭگەيىنە جەتۋگە مۇمكىندىك بەردى.
بەيبىت اتامقۇلوۆ كاسىپورىننىڭ ەكسپورتتىق الەۋەتىن دامىتۋعا باسا نازار اۋدارۋ قاجەتتىلىگىن العا تارتتى.