قايعىلى وقيعا 14 ماۋسىم كۇنى تاڭعى 7:00 شاماسىندا بولعان. الاتاۋ اۋدانىندا «حيۋنداي ەلانترا» ماركالى قىزمەتتىك كولىگىنىڭ جۇرگىزۋشىسى وتەمىس ۇلى كوشەسىمەن ءجۇرىپ كەلە جاتىپ, مانەۆر جاساعان كولىكتەن قاشامىن دەپ جاياۋ جۇرگىنشىنى قاعىپ كەتتى, دەپ حابارلايدى Egemen.kz.
پوليتسيا «حيۋنداي ەلانترا» قىزمەتتىك كولىگىمەن وتەمىس ۇلى كوشەسىنىڭ وڭتۇستىك باعىتىندا كەلە جاتىپ, كەنەتتەن مانەۆر جاساي باستاعان كولىكپەن سوقتىعىسۋدى بولدىرماۋ ءۇشىن اۆتوكولىك جۋ ورنىنىڭ شىعىس جاعىنا قاراي شىعىپ كەتكەن. سول جەردە جاياۋ جۇرگىنشى - س.ەسىمدى ازاماتتى قاعىپ, سونداي-اق «گازەل» اۆتوكولىگىنە سوقتىعىسقان.
«جول-كولىك وقيعاسى سالدارىنان جاياۋ جۇرگىنشى كوز جۇمدى. اتالعان فاكت سوتقا دەيىنگى تەرگەۋدىڭ بىرىڭعاي تىزىلىمىنە قر قك-ءنىڭ 345 بابى, 3 ءبولىمى بويىنشا تىركەلدى. قىلمىستىق ءىستى الماتى قالالىق پد انىقتاۋ باسقارماسى جۇرگىزۋدە. جۇرگىزۋشىگە قاتىستى تەرگەۋ امالدارى جۇرگىزىلىپ جاتىر», دەپ حابارلادى الماتى قالالىق پوليتسيا دەپارتامەنتىنىڭ ءباسپاسوز قىزمەتى.