قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى مارات احمەتجانوۆ بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريشپەن كەزدەستى, دەپ حابارلايدى Egemen.kz.
اگەنتتىك توراعاسى ءوز سوزىندە قازاقستانداعى بۇۇدب كەڭسەسىنىڭ باسشىسىنا كورسەتكەن ساراپتامالىق قولداۋى ءۇشىن العىس ايتىپ, يا. بەريشتى سىبايلاس جەمقورلىققا قارسى ءىس-قيمىلدىڭ تيىمدىلىگىن ارتتىرۋ بويىنشا قازاقستاندا قابىلدانىپ جاتقان شارالار تۋرالى حاباردار ەتتى.
اتاپ ايتقاندا, سىبايلاس جەمقورلىققا قارسى قىزمەت باسشىسى الدىن الۋ قۇرالدارىنىڭ كۇشەيتىلگەنىن, ول ءۇشىن بىرقاتار ماڭىزدى زاڭنامالىق شارالار قابىلدانعانىن اتاپ ءوتتى. قاراماعىنداعى قىزمەتكەرلەردىڭ سىبايلاس جەمقورلىعى ءۇشىن باسشىلاردىڭ وتستاۆكاسى جانە تارتىپتىك جاۋاپكەرشىلىگى ينستيتۋتى ەنگىزىلدى, نقا جوبالارىنىڭ سىبايلاس جەمقورلىققا قارسى ساراپتاماسى قالپىنا كەلتىرىلدى, سىبايلاس جەمقورلىق فاكتىلەرى تۋرالى حابارلاعان ازاماتتاردى كوتەرمەلەۋ جۇيەسى بەكىتىلگەن نۇسقادان سارالانعانعا وزگەرتىلدى, كۆازيمەملەكەتتىك سەكتورداعى كومپلاەنس-قىزمەتتەردىڭ مىندەتتىلىگى بەكىتىلدى.
اگەنتتىك توراعاسى سونداي-اق بۇۇدب وكىلىن قازىرگى ۋاقىتتا مەملەكەت باسشىسىنىڭ تاپسىرماسىنا سايكەس ەلىمىزدە قىلمىستىق پروتسەستىڭ ءۇش بۋىندى مودەلىنە بىرتىندەپ كوشۋ باستالعانىنان, بۇل قىلمىستىق-قۇقىقتىق پروتسەستە ازاماتتاردىڭ كونستيتۋتسيالىق قۇقىقتارىن ساقتاۋ كەپىلدىكتەرىن ارتتىرۋعا ىقپال ەتەتىندىگىنەن حاباردار ەتتى.
جالپى, انتيكور باسشىسىنىڭ پىكىرىنشە, جۇرگىزىلىپ جاتقان ساياسات ءوز ناتيجەسىن بەرۋدە. بۇنى قازاقستاننىڭ حالىقارالىق رەيتينگتەردەگى باعاسى دا كۋالاندىرادى. ماسەلەن, سىبايلاس جەمقورلىقتى ءتۇيسىنۋ يندەكسىندە قازاقستان العاش رەت 38 بالل جيناپ, 19 پوزيتسياعا (133-تەن 94-ورىنعا دەيىن) كوتەرىلدى.
ءوز كەزەگىندە, يا. بەريش ەلىمىزدىڭ سىبايلاس جەمقورلىققا قارسى ءىس-قيمىلداعى جەتىستىكتەرىن جوعارى باعالاپ, بۇۇدب-نىڭ ساراپشىلاردى تارتۋعا جانە وسى تۇرعىدان حالىقارالىق تاجىريبە ۇسىنۋعا ءاردايىم دايىن ەكەندىگىن اتاپ ءوتتى.
وسىعان بايلانىستى انتيكور مەن بۇۇدب-نىڭ «قوعامدىق مونيتورينگتى كۇشەيتۋ جانە مەملەكەتتىك سىبايلاس جەمقورلىققا قارسى ساياساتتى ىسكە اسىرۋعا ازاماتتىق سەكتوردى تارتۋ ارقىلى سىبايلاس جەمقورلىق دەڭگەيىن تومەندەتۋ» جوباسى شەڭبەرىندەگى بىرلەسكەن جۇمىسى وزەكتى بولىپ تابىلادى.
جوبانىڭ ماقساتى ازاماتتىق مونيتورينگ تەتىكتەرىن جەتىلدىرۋ ارقىلى مەملەكەتتىك ورگاندار قىزمەتىنىڭ تيىمدىلىگىن, اشىقتىعىن جانە ەسەپتىلىگىن ارتتىرۋعا جاردەمدەسۋ بولىپ تابىلادى.
كەزدەسۋ سوڭىندا تاراپتار ىنتىماقتاستىقتى ودان ءارى جانداندىرۋ ءۇشىن, كونسۋلتاتسيالاردى ساراپتامالىق دەڭگەيدە جالعاستىرۋعا كەلىستى.