قاراعاندى قالاسىنداعى «گورنياك» بازارىندا 33 جاستاعى ەر ادام كوز جۇمدى. ءۇش كۇن بۇرىن ءتارتىپ ساقشىلارى وسى جەردەن ايەلدىڭ ءمايىتىن تاپقان بولاتىن, دەپ حابارلايدى Egemen.kz.
«قازىرگى ۋاقىتتا وسى ەكى جاعدايدىڭ ءمان-جايى انىقتالىپ جاتىر, سوت-مەديتسينالىق ساراپتاما جۇرگىزىلۋدە. الەۋمەتتىك جەلىلەردەگى مالىمەتكە سايكەس, 9 ماۋسىم كۇنى «گورنياك» ايالداماسىندا ورنالاسقان دۇكەنگە كىرەبەرىستە ەر ادام جازاتايىم وقيعا سالدارىنان قازا تاپتى. مارقۇم قالاداعى فيرمالاردىڭ بىرىندە ەكسپەديتور بولىپ قىزمەت اتقارعان. ول الەۋمەتتىك پاۆيلونعا تاۋار الىپ كەلگەن. كۋاگەرلەردىڭ ايتۋىنشا, دۇكەننەن شىعابەرىستە باسپالداق سۇيەنىشىنە قولى تيگەن ەر ادامدى توق سوققان. الايدا, قاراعاندى اكىمدىگى بۇل فاكتىنى جوققا شىعارادى. «الەۋمەتتىك جەلىلەردە مايقۇدىق شاعىن اۋدانىندا ەلەكتر توعىنىڭ سوعۋىنا بايلانىستى جاس جىگىتتىڭ قازا بولعانى تۋرالى اقپارات تارالۋدا. قاراعاندى قالاسى پوليتسيا باسقارماسىنىڭ مالىمەتىنشە, ەر ادامنىڭ ءولىمى دەنساۋلىق جاعدايىنا بايلانىستى بولعان. اتالعان فاكتىگە سايكەس, سوت-مەديتسينالىق ساراپتاما تاعايىندالدى. تەرگەۋ امالدارى جۇرگىزىلۋدە. مەرزىمىنەن بۇرىن قورىتىندى جاساماۋدى جانە تەكسەرىلمەگەن اقپاراتتى تاراتپاۋدى سۇرايمىز. ساراپتاما قورىتىندىسى بويىنشا سەبەپ انىقتالادى», دەپ حابارلادى قاراعاندى قالاسى اكىمدىگىنىڭ ءباسپاسوز قىزمەتىنەن.
وقيعاعا قاتىستى وبلىستىق پوليتسيا دەپارتامەنتى دە تۇسىنىك بەردى.
«9 ماۋسىمدا پوليتسياعا دۇكەندەردىڭ بىرىندە ەر ادامنىڭ ءمايىتى تابىلعانى تۋرالى حابارلاما كەلىپ ءتۇستى. وقيعا ورنىنا شىققان كەزدە فاكتى راستالدى: ساۋدا نۇكتەسىنىڭ ماڭىندا دەنەسىندە زورلىق-زومبىلىق بەلگىلەرى جوق 33 جاستاعى ەر ادامنىڭ ءمايىتى تابىلدى. بۇل فاكتى پوليتسيادا تىركەلدى. سوت-مەديتسينالىق ساراپتاما تاعايىندالدى, ونىڭ ناتيجەلەرى بويىنشا ءىس جۇرگىزۋ شەشىمى قابىلداناتىن بولادى. پوليتسيا قىزمەتكەرلەرى وقيعانىڭ ءمان-جايىن انىقتاپ جاتىر», دەدى قاراعاندى وبلىسى پد ءباسپاسوز قىزمەتىنەن.
پوليتسيا اقپاراتىنا سۇيەنسەك, ءدال وسى جەردە ءۇش كۇن بۇرىن 36 جاستاعى ايەل قايتىس بولعان. ونىڭ ولىمىنە دەنساۋلىق جاعدايى سەبەپ بولعانى حابارلانۋدا.
«6 ماۋسىمدا سول اۋداندا دەنەسىندە زورلىق-زومبىلىق بەلگىلەرى جوق 36 جاستاعى ايەلدىڭ ءمايىتى تابىلدى. سوت-مەديتسينالىق ساراپتاما ونىڭ ءولىمىنىڭ سەبەبى جۇرەك اۋرۋى – «كەڭەيتىلگەن كارديوميوپاتيا» ەكەنىن انىقتادى», دەدى پوليتسيادان.