بيىل 10 ماۋسىمدا كۇن ساقينا ءتارىزدى تۇتىلادى. قازاقستاندىقتار سيرەك كەزدەسەتىن قۇبىلىستى تۇستەن كەيىن تاماشالاي الادى, دەپ حابارلايدى Egemen.kz.
نۇر-سۇلتاندا كۇننىڭ تۇتىلۋى ساعات 17.15-تە باستالىپ 19.03-تە اياقتالادى. بۇل قۇبىلىس شامامەن ساعات 18:11 كەزىندە انىق كورىنەدى. الماتىدا كۇننىڭ تۇتىلۋىن 17:44-تەن باستاپ, 19:05-كە دەيىن تاماشالاۋعا بولادى. اسىرەسە 18:26 شاماسىندا بۇل قۇبىلىس انىعىراق بايقالادى.
ۆ.گ.فەسەنكوۆ اتىنداعى استروفيزيكالىق ينستيتۋتىنىڭ جۇلدىزدار جانە تۇماندىقتار فيزيكاسى زەرتحاناسىنىڭ مەڭگەرۋشىسى, فيزيكا-ماتەماتيكا عىلىمدارىنىڭ كانديداتى ليۋبوۆ شەستاكوۆانىڭ ايتۋىنشا, 2021 جىلى كۇننىڭ ءتورت تۇتىلۋى بولادى. ولاردىڭ تەك بىرەۋى عانا كورىنەدى.
«كۇننىڭ تۇتىلۋىن ەرتەڭ بايقاۋعا بولادى. بۇل قۇبىلىس ساقينا ءتارىزدى بولادى. بۇل وتە سيرەك كەزدەسەتىن جانە تاڭعاجايىپ وقيعا. كۇن تۇتىلۋ بەلدەۋى سولتۇستىك امەريكا, سولتۇستىك مۇزدى مۇحيت, رەسەيدىڭ سولتۇستىك-شىعىس بولىگى ارقىلى وتەدى. قازاقستان اۋماعىندا تۇتىلۋدىڭ تەك جەكەلەگەن فازالارى عانا كورىنۋى مۇمكىن. ياعني, ەلدىڭ سولتۇستىك-شىعىس وبلىستارىندا پاۆلودار, پەتروپاۆل, وسكەمەن, سەمەي قالالارىندا انىق بايقالادى», دەدى ول.