قر پرەزيدەنتىنىڭ ءباسپاسوز حاتشىسى بەرىك ءۋالي مەملەكەت باسشىسى قاسىم-جومارت توقاەۆتىڭ تۇرعىن ءۇي جاعدايىن جاقسارتۋ ءۇشىن زەينەتاقى جيناقتارىن پايدالانۋعا بەرۋ جونىندەگى تاپسىرماسىنىڭ ورىندالۋى تۋرالى ارالىق ناتيجەلەردى ۇسىندى, دەپ حابارلايدى Egemen.kz.
بۇگىنگە دەيىن 16 075 قارىز الۋشى بۇعان دەيىن بانكتەردەن تۇرعىن ۇيلەرى ءۇشىن العان جالپى سوماسى 62 ميلليارد 41 ميلليون تەڭگە يپوتەكالىق قارىزىن تولىق وتەدى.
47 133 قارىز الۋشى جالپى سوماسى 144 ميلليارد 53 ميلليون تەڭگە بولاتىن تۇرعىن ءۇي يپوتەكالىق قارىزدارىنىڭ ءبىر بولىگىن وتەۋ ءۇشىن بىرجولعى زەينەتاقى تولەم جۇيەسىن پايدالاندى.
8 889 قارىز الۋشى بانكتەردەن جالپى سوماسى 150 ميلليارد 361 ميلليون تەڭگە بولاتىن تۇرعىن ءۇي يپوتەكالىق قارىزدارىن الۋ ءۇشىن العاشقى جارنا رەتىندە بىرجولعى زەينەتاقى تولەمى قاراجاتىن پايدالاندى.
بانكتەر بويىنشا ەڭ كوپ قارىز الۋشى «وتباسى بانك» اكتسيونەرلىك قوعامىندا تىركەلگەن. ولاردىڭ جالپى سانى – 37 228. بىرجولعى زەينەتاقى تولەمىن پايدالانۋ ارقىلى تۇرعىن ءۇي قۇرىلىس جيناقتارى جۇيەسى بويىنشا بەرىلگەن جاڭا تۇرعىن ءۇي يپوتەكالىق قارىزدارىنىڭ مولشەرى – 125 ميلليارد 29 ميلليون تەڭگە.
«سبەربانك» اق ەب – قارىز الۋشىلار سانى بويىنشا ەكىنشى ورىندا. ولاردىڭ جالپى سانى – 11 483.
ودان كەيىن «قازاقستاننىڭ ۇلتتىق بانكى» اكتسيونەرلىك قوعامىنان – 9 488 جانە «بانك تسەنتر كرەديت» اكتسيونەرلىك قوعامىنان – 8 432 ادام قارىز العان. اتالعان بانكتەردەن بىرجولعى زەينەتاقى تولەمىن پايدالانۋ ارقىلى جاڭادان الىنعان تۇرعىن ءۇي يپوتەكالىق قارىزدارىنىڭ مولشەرى – 23 ميلليارد 167 ميلليون تەڭگە.