قازاقستان رەسپۋبليكاسىنىڭ مەملەكەتتىك رامىزدەرى كۇنى پورتۋگال ۇلتىنىڭ «بەسىگى» دەپ اتالاتىن گيماراەش قالاسىندا قازاقستاننىڭ قۇرمەتتى كونسۋلدىعىنىڭ اشىلۋى ءوتتى, دەپ حابارلايدى Egemen.kz سىرتقى ىستەر مينيسترلىگىنە سىلتەمە جاساپ.
ءىس-شارادا قازاقستاننىڭ پورتۋگالياداعى ەلشىسى داۋلەت باتىراشەۆ, گيماراەش قالاسىنىڭ مەرى دومينگۋش براگانسا, قۇرمەتتى كونسۋلدىقتىڭ وكرۋگىنە كىرەتىن وڭىرلەردىڭ باسشىلارى, اكادەميالىق, قوعامدىق-ساياسي جانە ىسكەر توپتارىنىڭ, سونداي-اق باق وكىلدەرى قاتىستى. قازاقستاننىڭ قۇرمەتتى كونسۋلى جيل ۆيەيرا, «Resumeferico» كومپانياسىنىڭ باسشىسى براگا, ۆيانا-دۋ-كاشتەلۋ, ۆيلا-رەال, براگانسا, پورتۋ, اۆەيرۋ, ۆيزەۋ, گۋاردا, كويمبرا ي كاشتەلۋ-برانكۋ وڭىرلەرىندە ءوزىنىڭ قىزمەتىن جۇرگىزەدى.
سالتاناتتى راسىمدە ەلشى قازاقستاننىڭ قۇرمەتتى كونسۋلدىعىنىڭ قۇرىلۋى - بۇل ەكى ەل اراسىنداعى ساۋدا-ەكونوميكالىق, ينۆەستيتسيالىق جانە گۋمانيتارلىق ىنتىماقتاستىقتى ودان ءارى كەڭەيتۋگە ىقپال ەتە وتىرىپ, قازاق-پورتۋگال دوستىعى دامۋىنىڭ ايقىن دالەلى ەكەنىن باسا ايتتى. وتاندىق ديپلومات گيماراەش قالاسىنىڭ باسشىلىعىنا كورسەتكەن قولداۋى ءۇشىن العىسىن ءبىلدىرىپ, ج.ۆيەيراعا قۇرمەتتى كونسۋلىنىڭ قىزمەتىندە پايدالانۋ ءۇشىن مەملەكەتتىك رامىزدەرىن تاپسىردى.
پورتۋگاليانىڭ سولتۇستىك ايماقتارىنىڭ باسشىلارى قۇرمەتتى كونسۋلدىقتىڭ اشىلۋىمەن قۇتتىقتاي وتىرىپ, ول وڭىرارالىق ەكىجاقتى ىنتىماقتاستىعىنىڭ دامىتۋىنا ىقپال ەتەتىنىنە سەنىم ءبىلدىردى. ءوز تاراپىنان, گيماراەش قالاسىنىڭ مەرى دومينگۋش براگانسا قازاقستانمەن ءوزارا ءتيىمدى قارىم-قاتىناستاردى كەڭەيتۋگە قىزىعۋشىلىعىن ءبىلدىرىپ, ەكى ەل وڭىرلەرى اراسىنداعى ءوزارا ارەكەتتەستىكتى ودان ءارى دامىتۋ ءۇشىن ۇسىنا الاتىن قالانىڭ كەڭ مۇمكىندىكتەرىن اتاپ ءوتتى. وسى ورايدا, د. براگانسا تۋىستىق قاتىناستار ورناتۋ جانە ەكىجاقتى ىنتىماقتاستىقتىڭ كۇن ءتارتىبىن جان-جاقتى تالقىلاۋ ماقساتىندا تۇركىستان قالاسىنا جاقىن ۋاقىتتا بارۋعا نيەتتىلىگىن ءبىلدىردى.
ءوز قىزمەتىنە كىرىسكەن قۇرمەتتى كونسۋل قازاقستان ۇكىمەتىنە سەنىم بىلدىرگەنى ءۇشىن العىسىن ءبىلدىرىپ, قۇرمەتتى كونسۋلدىقتىڭ ءبىزدىڭ مەملەكەت ازاماتتارىنىڭ قۇقىقتارى مەن مۇددەلەرىن قورعاۋداعى, سونداي-اق ەكى ەلدىڭ ءوزارا ارەكەتتەسۋىنىڭ بارلىق سالالارىندا جانە ەلدەر اراسىنداعى ساۋدا-ەكونوميكالىق ىنتىماقتاستىعىنىڭ دامۋىنداعى ماڭىزدى ءرولىن اتاپ ءوتتى.
قر قۇرمەتتى كونسۋلدىعىنىڭ اشىلۋىمەن بىرگە, ءوڭىردىڭ ىسكەرلىك پەن وندىرىستىك الەۋەتىن ەسكەرە وتىرىپ, گيماراەش قالاسىندا قازاق-پورتۋگال تىكەلەي ىسكەرلىك بايلانىستاردى دامىتۋعا باعىتتالعان «Qazaq Sauda» ىسكەرلىك اسسوتسياتسياسىنىڭ جۇمىسى رەسمي تۇردە باستالعان بولاتىن. پورتۋگالدىق كاسىپكەرلەرىنىڭ باستاۋىمەن قۇرىلعان قاۋىمداستىق سەرىكتەستىك پەن كووپەراتسيالىق بايلانىستارىن ورناتۋعا كومەكتەسۋدىڭ, سونداي-اق ەكونوميكانىڭ باسىم سالالاردا بىرلەسكەن جوبالاردى ىسكە اسىرۋ بويىنشا بيزنەسكە قاجەتتى كەڭەسۋلەر بەرۋدىڭ ءتيىمدى قۇرالىنا اينالۋعا باعىتتالعان.
سونىمەن قاتار, قازاقستان رەسپۋبليكاسى تاۋەلسىزدىگىنىڭ 30 جىلدىعى مەرەيتويىنا ارنالعان بىرقاتار ءىس-شارالار اياسىندا, پورتۋگاليانىڭ تانىمال ورىنداۋشىلارى لارا الەيشۋ مەن نۋنو دە كامارا پەرەيرانىڭ قاتىسۋىمەن سالتاناتتى كونتسەرت ءوتتى. ولار باسقا شىعارمالارمەن قاتار, تانىمال «دۋداراي» جانە «ۇمىتىلماس كۇن» قازاق اندەرىن ورىندادى. سونداي-اق, كوپتەگەن قوناقتار, گيماراەش قالاسىنىڭ بارلىق تۇرعىندارىنا ەكى اپتاعا اشىلعان قازاقستان تۋرالى فوتوكورمەسى اياسىندا ەلىمىزدىڭ باي مادەنيەتىمەن, ونەرىمەن جانە تابيعاتىمەن تانىسۋ مۇمكىندىگىنە يە بولدى.