بىرىڭعاي جيناقتاۋشى زەينەتاقى قورى سالىمشىلارىنىڭ ينۆەستيتسيالىق تابىسى 475 ملرد تەڭگەگە جەتتى. جالپى, 2021 جىلدىڭ 1 مامىرىنداعى احۋال بويىنشا قور سالىمشىلارىنىڭ زەينەتاقى جيناعى 12,6 ترلن تەڭگەدەن استى. بۇل سوما زەينەتاقى جارنالارى مەن ينۆەستيتسيالىق تابىستى قامتيدى.
قاڭتار مەن مامىر ارالىعىندا سالىمشىلار شوتتارىنا 475,8 ملرد تەڭگە كولەمىندە تازا ينۆەستيتسيالىق تابىس تۇسكەن. بجزق حابارلاۋىنشا, ۇلتتىق بانكتىڭ باسقارۋىمەن زەينەتاقى اكتيۆتەرى بويىنشا كىرىستىلىك 3,8, ال ينفلياتسيا 2,7 پايىز بولعان. سوڭعى 12 ايدا ينفلياتسيا 7,0, كىرىستىلىك 9,8 پايىزدى كورسەتىپتى.
«سالىمشىلاردىڭ زەينەتاقى جيناقتارىنىڭ سوماسى زەينەتاقى اكتيۆتەرىن ينۆەستيتسيالاۋ ناتيجەلەرىنە سايكەس اپتا سايىن قايتا ەسەپتەلەدى جانە قايتا باعالانادى. ينۆەستيتسيالىق تابىستىڭ قۇرامىنا باعالى قاعازدار بويىنشا سىياقى, قارجى قۇرالدارىن نارىقتىق قايتا باعالاۋ, ۆاليۋتالىق قايتا باعالاۋ تۇرىندەگى كىرىستەر, سىرتقى باسقارۋداعى اكتيۆتەر بويىنشا كىرىستەر كىرەدى. بارلىق زەينەتاقى اكتيۆ – بجزق-عا بىرىكتىرىلگەن ساتتەن باستاپ ۇلتتىق بانك قامتاماسىز ەتكەن ينۆەستيتسيالىق تابىس شامامەن 5,2 ترلن تەڭگە بولدى. 2021 جىلعى 1 مامىرداعى جاعداي بويىنشا زەينەتاقى جيناقتارىنىڭ جالپى كولەمىندەگى تازا ينۆەستيتسيالىق تابىستىڭ ۇلەسى 35,6 پايىز بولادى», دەلىنگەن قور حابارلاماسىندا.
ەلىمىزدە زەينەتاقى جۇيەسى جۇمىس ىستەي باستاعان 1998 جىلدان باستاپ ەسەپتەر بولساق, تازا ينۆەستيتسيالىق تابىستىڭ 6 ترلن تەڭگەدەن اسقانىن بايقايمىز. قوردىڭ مالىمدەۋىنشە, زەينەتاقى جيناقتارى – ۇزاق مەرزىمدى ينۆەستيتسيا بولىپ سانالعاندىقتان, ينۆەستيتسيالىق تابىس مولشەرىن كەمىندە ءبىر جىل كەزەڭىندە تالداۋ ورىندى. كۇندەلىكتى نارىقتىق جاعداي ءجيى قۇبىلاتىندىقتان قىسقا مەرزىمدى دەرەكتەر كورسەتكىش بولىپ سانالمايدى.
ەسكە سالايىق, ءاربىر سالىمشى ءوزىنىڭ ينۆەستيتسيالىق تابىسىن enpf.kz سايتىنداعى جەكە كابينەتتەن نەمەسە ۇيالى قوسىمشانىڭ كومەگىمەن باقىلاي الادى.