قارجى ورتالىعىنا – 800-ءشى كومپانيا

كوميتەت وكىلدەرىنىڭ ايتۋىنشا, احقو قىز­مە­تىنە قىزىعۋشىلىق ارتىپ, قاتىسۋشىلاردىڭ سانى ۇلعايىپ كەلەدى. قازىر مۇندا 53 ەلدىڭ كومپانيا­لارى تىركەلدى. ولاردىڭ قاتارىندا قازاقستان, ۇلىبريتانيا, اقش, قحر, رف, ەستونيا, لاتۆيا, يتاليا, فينليانديا, وڭتۇستىك كورەيا, سينگاپۋر, مالايزيا, ءۇندىستان, ءباا, تۇركيا جانە باسقا دا مەملەكەتتەردىڭ كوممەرتسيالىق ۇيىمدارى بار. اتالعان كومپانيالار بانك, ساقتاندىرۋ, قور نارىعى, اكتيۆتەردى باسقارۋ, جەكە بانكينگ, يسلامدىق قارجىلاندىرۋ, كرەديتتىك رەيتينگتەر, زاڭگەرلىك كەڭەس بەرۋ, بۋحگالتەرلىك ەسەپ, حولدينگتىك كومپانيالار قىزمەتتەرى جانە باسقا دا كوپتەگەن سالادا قىزمەت تۇرلەرىن ۇسىنىپ كەلەدى.

«تاعى ءبىر جەتىستىگىمىزدى, اتاپ ايتقاندا قا­تىسۋشى كومپانيالاردىڭ سانى 800-گە جەتكەنىن قۋانىشپەن حابارلايمىز. احقو-دا جۇمىس ىستەۋگە شەشىم قابىلداعان كومپانيالار ونىڭ ارتىقشىلىقتارىن, ناقتى ايتساق اعىلشىن قۇقىعى مەن سالىقتىق جەڭىلدىكتەردى, سونداي-اق شەتەلدىك ينۆەستورلاردى قورعاۋ تەتىگىن قولدانىپ, ءوز بيزنەسىن دامىتۋعا ۇمتىلادى. ىسكەرلىك بەلسەن­دىلىك پەن وڭىرگە ينۆەستيتسيا تارتۋعا ارنالعان ينفرا­قۇرىلىمدى دامىتۋعا بايلانىستى جۇمىس­تى جالعاستىرىپ, قارقىنىمىزدى كۇشەيتە تۇسە­مىز», دەدى احقو قارجىلىق قىزمەتتەر كورسەتۋدى رەت­تەۋ جونىندەگى كوميتەتىنىڭ باس ديرەكتورى مۇحتار بوبەەۆ.

بىلتىردان بەرى بۇل كوميتەت تىركەۋ راسىمدەرىن تولى­عىمەن تسيفرلاندىردى. بۇل تىركەۋ پروتسەسىن ورتا­شا ەسەپپەن 3-5 كۇننەن 1 كۇنگە دەيىن قىس­قار­تۋعا مۇمكىندىك بەردى. تىركەۋ راسىمدەرىمەن بىرگە كەيبىر رەتتەلەتىن قىزمەت تۇرلەرىن ليتسەنزيالاۋ بارىسى, قارجى-تەحنولوگيالىق كومپانيالاردى اككرەديتتەۋ جانە ليتسەنزيالاۋ راسىمدەرى تسيفر­لاندىرىلدى.

ەسكە سالا كەتەيىك, قارجىلىق قىزمەتتەر كورسە­تۋ­دى رەتتەۋ جونىندەگى كوميتەت (AFSA) – استانا حالىقارالىق قارجى ورتالىعىندا قارجى­لىق قىزمەتتەردى جانە ونىمەن بايلانىستى قىزمەتتى باقىلاۋ ماقساتىندا قۇرىلعان تاۋەلسىز رەتتەۋشى سانالادى. احقو ەرەجەلەرى قارجى كومپانيالارى مەن نارىق ينستيتۋتتارىن ليتسەنزيالاۋدى, تىركەۋدى, اككرەديتتەۋدى جانە قاداعالاۋدى قامتاماسىز ەتەدى.