ەرجان سالحانوۆ پاۆلودار وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بولىپ تاعايىندالدى, دەپ حابارلايدى Egemen.kz.
ەرجان سالحانوۆ 1984 جىلى پاۆلوداردا دۇنيەگە كەلگەن. 2006 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىن «ونەركاسىپتىك جىلۋ ەنەرگەتيكاسى», ال 2009 جىلى «قۇقىقتانۋ» ماماندىقتارى بويىنشا ءبىتىردى.
ەڭبەك جولىن 2007 جىلى قر مەملەكەتتىك قىزمەت ىستەرى اگەنتتىگىنىڭ پاۆلودارداعى اقپاراتتاندىرۋ جانە تەستىلەۋ ورتالىعىندا وپەراتور قىزمەتىنەن باستاعان. سول جىلى پاۆلودار وبلىسىنىڭ ەنەرگەتيكا جانە كوممۋنالدىق شارۋاشىلىق باسقارماسىنىڭ باس مامانى قىزمەتىنە قابىلداندى.
2009 جىلى قر ەنەرگەتيكا جانە مينەرالدىق رەسۋرستار مينيسترلىگىنىڭ استانالىق ەلەكتر ەنەرگەتيكا جانە كومىر ونەركاسىبىن دامىتۋ دەپارتامەنتىنىڭ ساراپشىسى قىزمەتىنە تاعايىندالدى. 2010 جىلى قر يندۋستريا جانە جاڭا تەحنولوگيالار مينيسترلىگىنە اۋىسقاننان كەيىن, وندا 2014 جىلعا دەيىن جۇمىس ىستەپ, قىزمەتى ەنەرگيا ۇنەمدەۋ جانە ەنەرگيا تيىمدىلىگى دەپارتامەنتى جانىنداعى ەنەرگيا تيىمدىلىگى ديرەكتسياسىنىڭ باسشىسىنا دەيىن ءوستى.
2014 جىلى ول ۇلتتىق كاسىپكەرلەر پالاتاسىنا قاراستى ەنەرگەتيكا كوميتەتىنىڭ حاتشىلىعىنا ساراپشىلىق قىزمەتكە اۋىستى. سول جىلى «سامۇرىق – جاسىل ەنەرگيا» جشس-ءنىڭ جاڭارتىلاتىن ەنەرگيا كوزدەرىن دامىتۋ ءبولىمىنىڭ باستىعى بولىپ تاعايىندالدى. 2015 جىلدان باستاپ كۆازيمەملەكەتتىك جانە جەكە سەكتوردىڭ ءتۇرلى قۇرىلىمدارىندا جۇمىس ىستەدى – «سامۇرىق-ەنەرگو» اق, «Qaz Appartment Service Company» جشس, «قازاقستاندىق ەلەكتر جانە ەنەرگيا نارىعىنىڭ وپەراتورى» اق.
2019 جىلى پاۆلودارعا ورالىپ, وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى مىندەتىن اتقاردى.