2026 جىلى تۇركىستان وبلىسىندا 722 ەلدى مەكەن گازداندىرىلادى, دەپ حابارلايدى Egemen.kz
ەنەرگەتيكا ءمينيسترى نۇرلان نوعاەۆ ۇكىمەت وتىرىسىندا وسىنداي اقپارات بەردى.
«2021 جىلدىڭ 1 قاڭتارىنا وبلىستىڭ تابيعي گازبەن قامتاماسىز ەتىلۋى 64,4% نەمەسە شامامەن 1,3 ملن ادام تابيعي گازبەن قامتاماسىز ەتىلگەن. ۇسىنىلعان كەشەندى جوسپار اياسىندا سوزاق اۋدانىنداعى اۆتوماتتاندىرىلعان گاز تاراتۋ ستانتسياسىنان ماگيسترالدىق گاز قۇبىرىن جانە ماقتاارال اۋدانىندا 3 اۆتوماتتاندىرىلعان گاز تاراتۋ ستانتسياسىن سالۋ, سونىمەن قاتار ەلدى مەكەندەرگە گاز تاراتۋ جەلىلەرى مەن گاز جەتكىزۋ قۇبىرلارىن سالۋ جوسپارلانۋدا», دەدى نۇرلان نوعاەۆ.
ءمينيستردىڭ ايتۋىنشا, جەرگىلىكتى اكىمدىكتىڭ جوسپارى بويىنشا 2026 جىلعا قاراي گازداندىرىلعان ەلدى مەكەندەردىڭ سانىن 423-تەن 722-كە دەيىن ۇلعايتۋ كوزدەلگەن. بۇل حالىقتى گازبەن قامتۋ 1 ملن 274 مىڭ تۇرعىننان 1 ملن 720 مىڭ تۇرعىنعا دەيىن جەتەدى دەگەن ءسوز.
«بۇل ءوڭىردى گازداندىرۋ دەڭگەيىن اعىمداعى 64,4%-دان 85,4% دەيىن جەتكىزۋگە مۇمكىندىك بەرەدى. اكىمدىك بۇل كورسەتكىشكە بيۋدجەتتىك باعدارلامالار شەڭبەرىندە جانە «اۋىل – ەل بەسىگى» باعدارلاماسى بويىنشا, سونداي-اق جەرگىلىكتى بيۋدجەت قاراجاتى جانە باسقا دا ينۆەستيتسيا ەسەبىنەن قول جەتكىزۋدى جوسپارلاپ وتىر», دەدى ەنەرگەتيكا ءمينيسترى.