تۇركىستان وبلىسىنىڭ اكىمى ومىرزاق شوكەەۆتىڭ توراعالىعىمەن وتكەن اپپارات وتىرىسىندا تولەبي اۋدانىنىڭ سايرام-وگەم مەملەكەتتىك ۇلتتىق تابيعي پاركىنىڭ اۋماعىندا 7 ادامنىڭ جوعالۋىنا بايلانىستى سوڭعى مالىمەتتەر جاريالاندى, دەپ حابارلايدى Egemen.kz.
وڭىرلىك توتەنشە جاعدايلار دەپارتامەنتىنىڭ باسشىسى نۇرعالي ءجۇنىسوۆتىڭ مالىمدەۋىنشە, تاۋدا جوعالىپ كەتكەن تۋريستەر توبىن ىزدەستىرۋ جۇمىستارى كۇندىز-ءتۇنى ءجۇرىپ جاتىر. وعان قۇتقارۋشىلار, پوليتسيا قىزمەتكەرلەرى, شەكارا قىزمەتىنىڭ ات ءپاترۋلى, ۇلتتىق پارك قىزمەتكەرلەرى, الپينيستەر, جالپى 100-دەن استام ادام قاتىسۋدا.
«سونداي-اق 2 تىكۇشاق, 4 پيلوتسىز اۋە قۇرالدارى, 15 تەحنيكا, قۇتقارۋشىلاردىڭ 2 كينولوگيالىق قىزمەتى, پسيحولوگتار, جەدەل-جاردەم قىزمەتى جۇمىلدىرىلعان. الماتى قالاسىنان كومەككە كەلگەن ازاماتتار پيلوتسىز ۇشۋ قۇرالدارىنىڭ كومەگىن ۇسىنىپ, تۇنگى ۋاقىتا ىزدەستىرۋ جۇمىستارى جۇرگىزىلدى. 30 مامىر كۇنى قازاقستان جانە وزبەكستان توتەنشە جاعدايلار مينيسترلىكتەرىنىڭ ەكىجاقتى كەلىسىمى بويىنشا وزبەكستان رەسپۋبليكاسىنىڭ قۇتقارۋشىلارى ءوز اۋماقتارىندا وگەم وزەنى بويىندا ىزدەستىرۋ جۇمىستارىن باستادى», دەدى تجد باستىعى.
وبلىس اكىمى ومىرزاق شوكەەۆ مۇنداي جاعدايلاردىڭ الدىن الۋ جانە الداعى ۋاقىتتا بولدىرماۋ ماقساتىندا جاۋاپتى باسشىلارعا ءتيىستى تاپسىرمالار بەردى. تاۋلى ايماقتاردا قاۋىپسىزدىكتى قامتاماسىز ەتۋ شارالارىن كۇشەيتۋدى جۇكتەدى.