تۇرعىندار ونكولوگيالىق ناۋقاستارعا مەديتسينالىق كومەك ۇيىمداستىرۋدى بۇرىننان سۇراعان بولاتىن. جەرگىلىكتى بيلىك اتالمىش ماسەلە شەشىلىپ جاتقانىن ءمالىم ەتتى, دەپ حابارلايدى Egemen.kz.
جەزقازعان وڭىرىنە جۇمىس ساپارى بارىسىندا قاراعاندى وبلىسىنىڭ اكىمى جەڭىس قاسىمبەككە دەنساۋلىق ساقتاۋ سالاسىنداعى ينفراقۇرىلىمدىق جوبالار ۇسىنىلدى.
«وتكەن ەكى جىلدا وبلىستىق بيۋدجەتتەن قارجىلاندىرۋ جانە «قازاقمىس» كورپوراتسياسىنىڭ كومەگىنىڭ ارقاسىندا ءوڭىردىڭ مەديتسينالىق مەكەمەلەرىن جابدىقتاۋ جاقساردى. بىراق بۇل جەتكىلىكسىز. 2023 جىلعا دەيىن ەسەپتەلگەن بىرلەسكەن باعدارلامانى قابىلداپ, ىسكە اسىرۋعا كىرىستىك. ول ءۇش باعىتتى قامتيدى: ينفراقۇرىلىمدى دامىتۋ, مامانداردى تارتۋ, ماتەريالدىق-تەحنيكالىق جابدىقتاۋ», دەپ باياندادى جەزقازعان مەديتسينالىق ورتالىعىن ارالاۋ كەزىندە دەنساۋلىق ساقتاۋ باسقارماسىنىڭ باسشىسى گامال توقسامباەۆ.
ول ونكولوگيالىق ورتالىقتى ورنالاستىرۋ ءۇشىن دايىن تيپتىك عيمارات تاڭدالعانىن ايتتى. قازىردىڭ وزىندە مەملەكەتتىك ساراپتامادان ءوتىپ جاتقان جوبالىق-سمەتالىق قۇجاتتاما ازىرلەندى. قورىتىندى ماۋسىم ايىندا بولادى دەپ كۇتىلۋدە. وسىدان كەيىن قارجىلاندىرۋ ماسەلەسى شەشىلەدى.
سونىمەن قاتار جەزقازعاندا پەرزەنتحانا بولىمشەسى كوپسالالى اۋرۋحاناعا اۋىستىرىلادى.
جەڭىس قاسىمبەك مەديتسينالىق ورتالىقتىڭ جاعدايىمەن تانىسىپ, دارىگەرلەرمەن اڭگىمەلەستى.
«جەزقازعاندا دەنساۋلىق ساقتاۋ سالاسىن دامىتۋ ءۇشىن ءبىراز جۇمىستار اتقارىلدى.
مۇندا مودۋلدىك جۇقپالى اۋرۋلار اۋرۋحاناسى سالىندى. مامانداردىڭ جەتىسپەۋشىلىگى ءالى دە بار, بىراق بۇل ماسەلە شەشىلۋدە. ءبىزدىڭ مىندەتىمىز – سىزدەردىڭ ءوڭىر تۇرعىندارىڭىز وبلىس ورتالىعىنا بارماي-اق جوعارى بىلىكتى مەديتسينالىق كومەك الۋى ءۇشىن جاعداي جاساۋ. ول ءۇشىن قولىمىزدان كەلگەننىڭ بارلىعىن جاسايتىن بولامىز», دەدى وبلىس اكىمى.