ەلوردادا بۇقارالىق سپورت قالاي دامۋدا؟

«داۋلەت» تەننيس ورتالىعى سونداي-اق #it’sallaboutability (يۋنيسەف حالىقارالىق باعدارلاماسى) شەڭبەرىندە ينكليۋزيۆتى توپتى ەلىمىزدە العاش بولىپ ىسكە قوستى. بۇگىندە ورتالىق جانىنداعى تەننيسپەن اينالىساتىن بالالاردى قامتۋ 25%-عا ارتتى.

بۇقارالىق سپورتتى دامىتۋ جانە كوپبالالاردى قامتۋ ءۇشىن ەلوردا اكىمدىگى قولدانىستاعى الاڭداردى ساياباقتار مەن مەكتەپتەردەگى جاڭا تەننيس كورتتارىنا قايتا جابدىقتاۋدى جوسپارلاپ وتىر. ەگەر قازىر تەننيسپەن ءبىر مىڭعا جۋىق بالا اينالىساتىن بولسا, وندا بۇل جوبانى ىسكە اسىرعاننان كەيىن 10 مىڭعا جۋىق بالا اينالىسا الادى.

«مەملەكەت باسشىسىنىڭ تاپسىرماسى بويىنشا بالالار مەن ەرەسەكتەردى بۇقارالىق سپورتقا قىزىقتىرۋ ءۇشىن جۇمىس جۇرگىزىپ جاتىرمىز. سونىمەن قاتار, بۇل سپورتتى جاڭا باستاعاندارعا دا كومەكتەسەدى. جاڭا سپورت كەشەندەرى مەن الاڭدارى ءتۇرلى سپورت تۇرلەرىن دامىتۋدى ساپالى جاڭا دەڭگەيگە شىعارۋعا مۇمكىندىك بەرەدى», دەپ اتاپ ءوتتى ەلوردا اكىمى التاي كولگىنوۆ.

«داۋلەت» تەننيس ورتالىعى مەن قازاقستان تەننيس فەدەراتسياسى سپورتتىق قۇرال-جابدىقتار جەتكىزىپ, شەبەرلىك ساباقتارىن وتكىزەدى.

«بالالاردىڭ جىل بويى تەننيسپەن اينالىسۋىنا بارىنشا جاعداي جاساعىمىز كەلەدى. جازدىگۇنى اشىق اسپان استىندا جاڭا تەننيس كورتىندا جاتتىقسا, قالعان ۋاقىتتا بىزدە دايىندالادى», دەيدى «داۋلەت» تەننيس ورتالىعىنىڭ جەتەكشىسى دينا تەمىرعاليەۆا.

«داۋلەت» تەننيس ورتالىعىن 2019 جىلدىڭ كۇزىندە قازاقستان تەننيس فەدەراتسياسى اشتى. سپورت كەشەنىندە 8 جابىق جانە 5 اشىق كورت, جاتتىعۋ زالدارى, تەوريالىق ساباقتارعا ارنالعان ادىستەمەلىك زالدار, تاماقتانۋ ورنى جانە ت.ب. بار.

ەستەرىڭىزگە سالا كەتەيىك, 2020 جىلى ەلوردا اكىمدىگى 76 گەكتاردان استام اۋماقتى اباتتاندىردى, بۇل شامامەن 150 اۋلا مەن 60 قوعامدىق كەڭىستىك (ساياباقتار, گۇلزارلار, جەلەكجولدار). وسىلايشا ەلوردا تۇرعىندارىنىڭ تورتتەن ءبىر بولىگىنىڭ سپورتپەن اينالىسۋىنا جانە سەرۋەندەۋىنە ارنالعان ورىندار اشىلدى.

اۋلالار مەن قوعامدىق كەڭىستىكتەر قالا تۇرعىندارىن جۇمىلدىرىپ سالىنۋدا جانە جوندەۋ جۇرگىزىلۋدە.