پاۆلوداردا موتوتسيكل جۇرگىزۋشىسى جول اپاتىنان كوز جۇمدى

وبلىستىق پد ءباسپاسوز قىزمەتىنىڭ مالىمەتىنشە, 27 مامىر كۇنى ساعات 14.15-تە ماي اۋدانى ەڭبەكشى اۋىلىنىڭ ماڭىندا 49 جاستاعى موتوتسيكل جۇرگىزۋشىسى ءجۇرىپ كەلە جاتقان ساتتە ءرولدى باسقارا الماي, اۋدارىلىپ قالعان.

– جول-كولىك وقيعاسى سالدارىنان جۇرگىزۋشى وقيعا ورنىندا كوز جۇمدى. موتوتسيكل ارنايى ايىپ تۇراعىنا قويىلدى. سوت-مەديتسينالىق ساراپتاما تاعايىندالدى, –دەپ حابارلادى پاۆلودار وبلىسى پوليتسيا دەپارتامەنتى باستىعىنىڭ ورىنباسارى جاندوس ورىمباەۆ.

سونداي-اق ساعات 19.00-دە پاۆلودار قالاسىندا كاتاەۆ – تولستوي كوشەلەرىنىڭ قيىلىسىندا «ميتسۋبيسي دەليكا» اۆتوكولىگىنىڭ 34 جاستاعى جۇرگىزۋشىسى جاياۋ جۇرگىنشىنى قاعىپ كەتكەن.

جول-كولىك وقيعاسى سالدارىنان زەينەتكەر جاراقات الىپ, اۋرۋحاناعا جەتكىزىلدى. اۆتوكولىك ايىپ تۇراعىنا قويىلدى. تەكسەرۋ جۇرگىزىلەدى.

ايتا كەتەيىك, اعىمداعى جىلدىڭ باسىنان وبلىس اۋماعىندا 125 جكو تىركەلگەن, سالدارىنان 7 ادام قازا تاۋىپ, 191 ادام جاراقات العان.