باتىس قازاقستان وبلىسىندا بيىل 111 مىڭعا جۋىق وقۋشى وقۋ جىلىن اياقتادى. ولاردىڭ 5916-سى 11 سىنىپ ءبىتىرىپ, ۇلكەن ومىرگە قانات قاقپاق. وڭىردە 430 وقۋشى التىن بەلگىدەن, 185 وقۋشى ۇزدىك اتتەستاتتان ءۇمىتتى, دەپ حابارلايدى Egemen.kz.
پاندەميانىڭ سەبەبىنەن ءداستۇرلى قالپى بۇزىلىپ, توقسان تۇرلەنگەن 2020-2021 وقۋ جىلى دا اياقتالدى. بۇل كەزەڭ ۇستاز ءۇشىن دە, شاكىرت پەن اتا-انا ءۇشىن دە وڭاي بولعان جوق. سوڭعى ەكى ايدان ارتىق ۋاقىتتان بەرى «قىزىل ايماقتان» شىقپاعان باتىس قازاقستان وبلىسىندا سانيتارلىق-ەپيدەميولوگيالىق جاعدايعا بايلانىستى سوڭعى قوڭىراۋ سالتاناتى تەك مەكتەپ ءبىتىرۋشى 9 جانە 11 سىنىپ تۇلەكتەرىنە ارنالىپ ءوتتى.
– مەكتەپ تۇلەكتەرىنىڭ قورىتىندى اتتەستاتتاۋى 28 مامىردا باستالادى. 9-سىنىپ وقۋشىلارىنىڭ قورىتىندى ەمتيحاندارى 28 مامىر مەن 5 ماۋسىم ارالىعىندا وتەدى. ولار ءۇش ءپان بويىنشا قورىتىندى اتتەستاتتان وتەدى. ال 11-سىنىپ وقۋشىلارىنىڭ مەملەكەتتىك ەمتيحاندارى 1-10 ماۋسىم ارالىعىنا قويىلدى, – دەيدى وبلىستىق ءبىلىم باسقارماسىنىڭ باسشىسى ايگۇل مىڭباەۆا.
مەكتەپ بىتىرۋشىلەر ءتورت ءپان بويىنشا ەمتيحان تاپسىرماق. «التىن بەلگىگە» ۇمىتكەرلەردىڭ جازبا جۇمىسىن ءبىلىم باسقارمالارى جانىنان قۇرىلعان كوميسسيا تەكسەرەدى. كوميسسيا قۇرامىنا بىلىكتى, تاجىريبەلى مۇعالىمدەر كىرگەن. بۇرىن مەكتەپ پەن ءبىلىم بولىمدەرى ۇمىتكەرلەردىڭ جۇمىسىن وزدەرى تەكسەرىپ, «التىن بەلگىنى» تاپسىرۋ تۋرالى شەشىم قابىلدايتىن ەدى. بيىل مەكتەپتەر بۇرىنعىداي وقۋ وزاتتارىنىڭ ءتىزىمىن وزدەرى جاساي المايتىن بولعان.
پاندەميا بيىل ءداستۇرلى وقۋ ىرعاعىن بۇزعانى بەلگىلى. سوندىقتان اتا-انالاردىڭ ءوتىنىشى بويىنشا «جازعى مەكتەپ» ۇيىمداستىرىلاتىن بولدى. نەگىزگى ماقسات – پاندەميا, شەكتەۋ شارالارى كەزەڭىندە جىبەرىلگەن ءبىلىم ولقىلىعىنىڭ ورنىن تولتىرۋ. 26 مامىر مەن 19 ماۋسىم ارالىعىندا جۇمىس ىستەيتىن جازعى مەكتەپتەردە وبلىستاعى وقۋشىلاردىڭ 55,5%-ى, ياعني 53509 شاكىرت نيەت ءبىلدىرىپ وتىر. وسىلايشا 376 مەكتەپتە قوڭىراۋ ءۇنى ءالى ءبىراز شىعاتىن بولدى.
وتكەن جىلى وقۋشىلار پاندەميانىڭ سەبەبىنەن جازعى دەمالىسىن ۇيىمداستىرىلعان ورتالىقتاردا, لاگەرلەردە وتكىزە المادى. ال بيىل ەلىمىزدىڭ باس سانيتار دارىگەرى بالالاردىڭ قالا سىرتىنداعى ساۋىقتىرۋ لاگەرلەرىندە دەمالۋىنا, ەم الۋىنا رۇقسات بەرىپ وتىر. ارينە, بارلىق قاۋىپسىزدىك شارالارى جاسالادى. قازىر وبلىستا قالا سىرتىنداعى 20 لاگەر بار.
– جازعى ساۋىقتىرۋ لاگەرلەرىنە قىزمەتكەرلەر COVID-19-عا زەرتحانالىق زەرتتەۋدەن ءوتىپ نەمەسە COVID-19-عا قارسى ۆاكتسيناتسيانىڭ تولىق كۋرسىن العان سوڭ عانا قابىلدانادى. بالالار دا لاگەرگە دەنساۋلىق جاعدايى تۋرالى قۇجاتىمەن, 72 ساعات ىشىندە جۇرگىزىلگەن پتر تەست قۇجاتىمەن كەلۋى ءتيىس, – دەيدى ايگۇل ادىلگەرەيقىزى.
ءوڭىر «قىزىل» ايماقتا بولعاندىقتان, مەكتەپ جانىنان جازعى دەمالىس ورىندارى اشىلمايتىن بولدى.