«Nur Otan» پارتياسى نۇرسۇلتان نازارباەۆتىڭ حالىقپەن ءوزارا ءىس-ارەكەت جاساۋدىڭ پرواكتيۆتى فورماتىنا كوشۋ جونىندەگى تاپسىرماسى جانە «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ شەڭبەرىندە قازاقستاندىقتاردىڭ تۇيىندى ماسەلەلەرىنە باسا نازار اۋدارىپ جاتىر, دەپ حابارلايدى Egemen.kz.
پارتيا ءباسپاسوز قىزمەتى تاراتقان اقپاراتقا سايكەس, جىل باسىنان بەرى ازاماتتاردىڭ وتىنىشتەرى نەگىزىندە 2 مىڭنان استام ءتۇرلى رەيد ۇيىمداستىرىلدى.
ماسەلەن, الماتى وبلىسىندا پارتيالىق باقىلاۋ وڭىرلىك كوميسسياسى پانفيلوۆ اۋدانىنا قاراستى سۇپتاي اۋىلى تۇرعىندارىنىڭ شاعىمى بويىنشا تەكسەرۋ جۇرگىزدى. وندا 200-گە جۋىق وقۋشى اپاتتى جاعدايدا تۇرعان بۇرىنعى بالاباقشا عيماراتىندا وقۋعا ءماجبۇر.
تەكسەرۋ بارىسىندا 1998 جىلى جىلۋ جۇيەسىنىڭ جوقتىعىنان مەكتەپ عيماراتى جابىلىپ, 2011 جىلى پايدالانۋعا جارامسىز دەپ تانىلعانى انىقتالدى. نۇروتاندىقتار وبلىستىق ءبىلىم باسقارماسىنا وسى جىلدىڭ سوڭىنا دەيىن جوبالىق-سمەتالىق قۇجاتتامانى ازىرلەۋگە جانە 2022 جىلدىڭ سوڭىنا دەيىن جاڭا مەكتەپ قۇرىلىسىن اياقتاۋعا قاراجات ءبولۋدى ۇسىندى. بۇل ماسەلە پارتيانىڭ وبلىستىق فيليالىنىڭ ەرەكشە باقىلاۋىندا.
ەلورداداعى تۇرعىن ءۇي كەشەندەرىنىڭ بىرىندە پاتەر يەلەرى قونىس تويىن تويلاي الماي وتىر. ويتكەنى قۇرىلىس سالۋشى الەۋمەتتىك وسال وتباسىلار رەتىندە اكىمدىكتەن «نۇرلى جەر» باعدارلاماسى بويىنشا بەرىلگەن پاتەرلەرىنە تۇرعىنداردى كىرگىزبەيدى. وسى جاعدايعا «Nur Otan»-نىڭ ەلوردالىق فيليالى جەدەل نازار اۋداردى. پارتيالىق باقىلاۋ كوميسسياسى قالالىق قۇرىلىس باسقارماسىنا ماسەلەنى قىسقا مەرزىمدە شەشۋدى ۇسىندى. بۇل رەتتە ازاماتتاردىڭ وتىنىشتەرىنە ۋاقىتىلى جاۋاپ بەرمەگەنى ءۇشىن باسقارما باستىعى ارسەن جانعاسقانوۆ «ەسكەرتۋ» تۇرىندەگى پارتيالىق جاۋاپكەرشىلىككە تارتىلدى.
سەمەي قالاسىندا قۇرىلىس سالۋشى مەن تۇرعىن ءۇي الاپتارىنىڭ ءبىرىنىڭ تۇرعىندارى اراسىنداعى جانجال رەتتەلدى. مۇندا سول ايماقتاعى جالعىز جولعا ساۋدا ورتالىعىن سالۋ جوسپارلانعان. بۇل تۇرعىنداردىڭ ءوز ۇيلەرىنە كىرىپ-شىعۋىن قيىنداتادى. ويتكەنى ولاردىڭ ۇيلەرى بارلىق جاعىنان تەمىرجولمەن قورشالعان. وسى ىسكە پارتيا ارالاسقاننان كەيىن, قۇرىلىس سالۋشىمەن جولدى جاپپاي, بۇرىنعى قالپىندا قالدىرۋ تۋرالى كەلىسىمگە قول جەتكىزىلدى. سالىنعان قورشاۋلار الىنىپ تاستالدى.
الماتىدا المەرەك شاعىن اۋدانىنىڭ تۇرعىندارى جەرگىلىكتى كوممۋنالدىق قىزمەتتىڭ بۇرىن اسفالتتالعان جولدى ءبۇلدىرىپ, جاڭا سۋ قۇبىرىن سالعانىنا شاعىمداندى. اقىرىندا قالا تۇرعىندارى سۋسىز, جولسىز قالعان. تەكسەرۋ قورىتىندىسى بويىنشا نۇروتاندىقتار 10 ماۋسىمعا دەيىن تۇرعىنداردى سۋمەن قامتاماسىز ەتۋدى جانە جولدى جوندەۋدى ۇسىندى. بۇل ماسەلە پارتيانىڭ الماتى قالالىق فيليالىنىڭ باقىلاۋىندا.