تاۋەلسىزدىك العان جىلداردان مەملەكەت تاراپىنان ءبىلىم الۋعا, شىعارماشىلىعىن دامىتۋعا, ەڭبەكتەنۋگە ۇمتىلعان جاستاردى قولداۋ ماقساتىندا بىرقاتار باعدارلاما مەن جوبالار ىسكە اسىرىلۋدا. ولاردىڭ ءبىرى قر تۇڭعىش پرەزيدەنتى-ەلباسىنىڭ باستاماسىمەن تاعايىندالعان «دارىن» مەملەكەتتىك جاستار سىيلىعى. وسى جىلدار ىشىندە 294 ادام سىيلىق يەگەرى اتاندى. بۇل تۋرالى اقدم جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ مالىمدەدى, دەپ حابارلايدى Egemen.kz.
«دارىن» مەملەكەتتىك جاستار سىيلىعى 1992 جىلدان باستاپ جەمىستى عىلىمي, شىعارماشىلىق, قوعامدىق قىزمەت, سونداي-اق جوعارى سپورتتىق جەتىستىكتەرى ءۇشىن 10 نوميناتسيا بويىنشا بەرىلەدى. «دارىن» سىيلىعىنا حالىقارالىق جانە رەسپۋبليكالىق بايقاۋلاردىڭ, فەستيۆالدار مەن كورمەلەردىڭ لاۋرەاتتارى, رەسپۋبليكالىق جانە حالىقارالىق دەڭگەيدەگى سپورتتىق جارىستاردىڭ جۇلدەگەرلەرى مەن جەڭىمپازدارى ۇمىتكەر بولا الادى», دەدى ش.بايمانوۆ.
ايتا كەتەيىك, ەلىمىزدىڭ اسقاق تۋىن الەمگە جەلبىرەتىپ تانىتقان سپورتشىلارىمىز سەرىك ساپيەۆ, ولگا شيشيگينا, دانيار ەلەۋسىنوۆ, يۋليا گالىشەۆا, ونەر سالاسىندا وزىندىك ورنى بار ديماش قۇدايبەرگەن, «مۋز ارت», «جىگىتتەر», « ۇلىتاۋ» توپتارى, كلاسسيكالىق مۋزىكادان ماريا مۋدرياك, جىبەك مۋسۋرگاليەۆا, حالىق شىعارماشىلىعىنداعى تۇلعالار كۇنسۇلۋ تۇرىكپەن, مۇقيات اسقار, بەلگىلى اكتەرلەر ءادىل احمەتوۆ, اسىلحان تولەپوۆ جانە ت.ب. ونەرلى جاستار ءار جىلدارى «دارىن» مەملەكەتتىك جاستار سىيلىعىنىڭ يەگەرلەرى اتاندى.