اپەننين تۇبەگىندە ءوتىپ جاتقان ۆەلوشاباندوزدار اراسىنداعى «دجيرو د’يتاليا» كوپكۇندىگى ءبىر كۇنگە سوزىلعان دەمالىستان كەيىن قايتا جالعاستى, دەپ حابارلايدى Egemen.kz.
11 تۋر ترازيمەن كولىنىڭ جاعالاۋىندا ورنالاسقان پەرۋدجا قالاسىنان باستاۋ الىپ, كەرەمەت شاراپتار شىعارۋىمەن داڭقى شىققان مونتالچينو شاھارىندا ءوز مارەسىنە جەتتى. ارا قاشىقتىعى 162 شاقىرىمدى قۇراعان سايىستا شۆەيتساريالىق ماۋرو شميدت («Qhubeka ASSOS») شاشاسىنا شاڭ جۇقتىرمادى. ول مارە سىزىعىن 1 ساعات 4 مينۋت 32 سەكۋندتا قيىپ ءوتتى. يتاليالىق الەسساندرو كوۆي («UAE-Team Emirates») ەكىنشى ورىن السا, بەلگيالىق حارم ۆانحاۋكە («Lotto-Soudal») ءۇشىنشى ساتىعا جايعاستى.
«استانانىڭ» ساپىندا ونەر كورسەتەتىن رەسەيلىك لەگيونەر الەكساندر ۆلاسوۆ بۇل جولى دا جاقسى ناتيجە كورسەتتى. كەزەڭ جەڭىمپازىنان 3 مينۋت 32 سەكۋند قانا قالىپ قويعان ول 13 ورىنعا تابان تىرەدى.
جالپى ەسەپتە ەگان بەرنال («INEOS Grenadiers») الدىنا جان سالار ەمەس. كولۋمبيالىق ۆەلوشاباندوزدىڭ ۋاقىتى – 42 ساعات 35 مينۋت 21 سەكۋند. ال «استانانىڭ» سەركەسى ەكىنشى ورىندى يەلەنۋدە. الەكساندر ۆلاسوۆ كوشباسىنداعى سپورتشىدان 45 سەكۋند قالىپ كەلەدى.