انا مەن بالا ساۋلىعى ءھام ولاردىڭ الاڭسىز ءومىرى مەملەكەت بەدەلىن بيىكتەتىپ, بىرلىگىن بەكەمدەيدى. سوندىقتان دا انالاردى قولداۋ ءارى ولارعا رۋحاني-ماتەريالدىق تۇرعىدان دەم بەرۋ مەملەكەتتىك ساياساتتىڭ باسىم باعىتتارىنىڭ ءبىرى. تۇتاس ەل كولەمىندە جۇزەگە اسىپ كەلە جاتقان «باقىتتى وتباسى» باعدارلاماسى تالاي جانعا دەمەۋ, سان كوڭىلگە مەدەۋ سىيلاعانى قۋانىشتى جايت.
قانات قاققان بىرەر جىلدىڭ ىشىندە اۋقىمدى جوبانىڭ ايماقتارداعى اياق الىسى جامان ەمەس. الماتىدا كوپبالالى جانە از قامتىلعان وتباسىلارعا ارنالعان توعىز بىردەي «باقىتتى وتباسى» الەۋمەتتىك ورتالىعى بار. ماسەلەن, الىپ شاھاردىڭ ءبىر عانا مەدەۋ اۋدانىندا اتالعان باعدارلامانىڭ كومەگىمەن قانشاما مۇقتاج جاننىڭ باعىت-باعدار العانىن اۋىز تولتىرىپ ايتۋعا بولادى. 2019 جىلدىڭ اقپانىنان باستاپ جۇمىس ىستەپ كەلە جاتقان مەدەۋ اۋداندىق «باقىتتى وتباسى» الەۋمەتتىك ورتالىعى كوپبالالى, از قامتىلعان, تولىق ەمەس جانە مۇمكىندىگى شەكتەۋلى بالالارى بار وتباسىلارعا قىزمەت كورسەتىپ كەلەدى.
ء«بىزدىڭ ورتالىق الەۋمەتتىك ال-اۋقاتى تومەن وتباسىلاردىڭ بالالارىن بالاباقشا كەزەگىنە تۇرعىزۋ, اتاۋلى الەۋمەتتىك كومەككە تىركەۋ, جەكە كۋالىكتەرىن قالپىنا كەلتىرۋ, «وڭاي» كارتاسىنا تىركەلۋگە سەپتەسۋ, «وتباسى» بانكىنە ارنالعان قۇجاتتاردى جيناۋ ماسەلەلەرى مەن زاڭدىق جانە پسيحولوگيالىق تۇرعىدان تۋىنداعان سۇراقتار بويىنشا كومەك كورسەتەدى. تەك قانا بۇل كومەكتەرمەن شەكتەلىپ قالمايمىز. ورتالىق تەگىن پسيحولوگ جانە زاڭگەر قىزمەتتەرىنەن بولەك, «بيزنەس بويىنشا كەڭەس», تىگىن, ماسساج, ۇيالى تەلەفون جانە گادجەتتەردى جوندەۋ, باۋ-باقشا جانە تاعى دا باسقا تەگىن كۋرستاردى ۇيرەتەدى. كاسىپپەن اينالىسقىسى كەلەتىن انالاردىڭ بيزنەس يدەياسىن جۇزەگە اسىرىپ, قارجىلىق قولداۋ كورسەتەمىز. ەگەر انالار زاڭگەر كەڭەسىنە مۇقتاج بولسا, بيزنەستى قالاي جانە نەدەن باستاۋ كەرەگىن بىلمەسە جانە وتباسى تاقىرىپتارىندا وزگە دە ساۋالدار مازالاسا ءبىزدىڭ ورتالىققا جۇگىنۋىنە بولادى», – دەيدى مەدەۋ اۋدانى «باقىتتى وتباسى» الەۋمەتتىك ورتالىعىنىڭ باسشىسى تولقىن سامەتوۆا.
ورتالىق جەتەكشىسى تىلگە تيەك ەتكەندەي, اتاۋلى الەۋمەتتىك كومەككە تاۋەلدى بولماي, كوپبالالى انالاردىڭ كاسىپتىك تۇرعىدان دامۋىنا ارنالعان تەگىن كۋرستار مەن بيزنەس باستاۋ ءۇشىن گرانت ۇتىپ الۋ مۇمكىندىگى تالاي جانعا ءۇمىت سىيلاعان. ورتالىقتا تەگىن ءبىلىم الىپ, العاشقى قولداۋدىڭ ناتيجەسىندە ءوز كاسىبىن ورگە دوڭگەلەتكەندەر از ەمەس. سولاردىڭ ءبىرى – جانات سەرىكباەۆا مەن ايگۇل دۋسەنباەۆا. تىگىن ءىسى بويىنشا ءتالىم الىپ, ارقايسىسى 2 ملن تەڭگەلىك گرانت ەنشىلەگەن قوس الماتىلىق تىزە بىرىكتىرىپ تىگىن تسەحىن اشقان. سۇيىكتى ىسىنەن ءناسىبىن تاپقان ىسمەرلەر الداعى ۋاقىتتا كاسىپتەرىنىڭ اۋقىمىن كەڭەيتۋدى كوزدەيدى.
ء«ىس تىگۋگە بالا كۇنىمنەن اۋەستەندىم. اجەلەرىمىزدىڭ قولىنان ۇرشىق تۇسپەيتىن. مۇنىڭ ءبارى كوز الدىمىزدا قاتتالىپ قالعان ءبىز, بۇل ءىستىڭ نەگىزگى قىر-سىرىن جاسىمىزدان بويىمىزعا سىڭىردىك دەسەك بولادى. «باقىتتى وتباسى» جوباسى ارقىلى قول جەتكىزگەن گرانتىمىز ءوز ارمانىمىزدى ىسكە اسىرۋعا دەمەۋ بولدى. بۇگىنگى تاڭدا اتالعان ماماندىق ۇلكەن سۇرانىسقا يە. ءبىزدى قولداپ, قارجىلاي كومەك كورسەتكەن جوباعا العىسىمىز شەكسىز. بۇل شىن مانىندە, ەڭبەككەر انالار ءۇشىن تاپتىرماس مۇمكىندىك», دەيدى ج.سەرىكباەۆا.
وتباسى قۇندىلىقتارى تۇرمىستىق جايتتاردىڭ تاساسىندا قالماس ءۇشىن انالاردى رۋحاني قولداۋ ماڭىزدى. الەم ەلدەرىنىڭ ىشىندە اجىراسۋ كورسەتكىشى جاعىنان قازاقستان الدىڭعى ورىنداردىڭ بىرىندە تۇرعانىن اۋىر دا بولسا مويىنداۋعا تۋرا كەلەدى. وسىنى ەسكەرگەن ورتالىق ماماندارى ومىرىنە شاعىم ايتىپ كەلگەن جانداردىڭ كوڭىلىن اۋلاپ, ساناسىن سەرپىلتۋگە زور ءمان بەرەدى. كاسىبي پسيحولوگتار, ءتىپتى تىرشىلىكتەن باز كەشكەنىن ايتىپ الدارىنا جۇگىنگەن انالارعا مورالدىق دەمەۋ بەرىپ, ورتالىق ارقىلى جان-جاقتى قولداۋ كورسەتكەن. ولاردىڭ ىشىندە ورتالىق كومەگىمەن جەكە بيزنەسىن باستاپ, قارجىلىق تاۋەلسىزدىككە قول جەتكىزگەندەر دە بار» دەيدى ماماندار. مۇنداعى كومپيۋتەرلىك ورتالىقتا ءتۇرلى كۋرستار جۇرگىزىلسە, بالالارىمەن كەلگەن انالار ءۇشىن ارنايى بولمەلەر دە قاراستىرىلعان. وندا كۋرس ۋاقىتى بىتكەنشە تاربيەشىلەر بالالاردى سۋرەت سالىپ, جەلىممەن ءتۇرلى پىشىمدەر جاساۋعا باۋليدى.
2019 جىلى الماتى قالاسىنىڭ اكىمدىگى «وتباسى» بانكىمەن بىرلەسە وتىرىپ, كوپبالالى جاندار ءۇشىن «باقىتتى وتباسى» بيۋدجەتتىك نەسيە بەرۋ باعدارلاماسىن ىسكە قوسقانى ءمالىم. باعدارلامانىڭ ناتيجەسىندە جۇزدەگەن ۇيەلمەن جەڭىلدەتىلگەن نەسيەمەن ءۇي الىپ, قونىس تويىن تويلاعان بولاتىن.
قىسقا مەرزىم ىشىندە جۇزەگە اسقان جوبا تالاي جاننىڭ جۇزىنە شۋاق سىيلاعانى قۋانتادى. الداعى ۋاقىتتا مۇنداي ناعىز قاجەتتى باعدارلامانىڭ اۋقىمى كەڭەيتىلىپ, شالعاي ايماقتارداعى كاسىبي مامانداردىڭ كەڭەسىنە ءزارۋ بولىپ وتىرعان جاندارعا دا قامقورلىق كورسەتىلسە قۇبا-قۇپ.
الماتى