«تۇمار» ۇلتتىق تەلەۆيزيالىق بايگەسى جالىندى تۇلعالار مەن تىڭ باستامالاردىڭ جاسامپاز جولىنا اينالدى. بۇل تۋرالى «تۇمار» ۇلتتىق تەلەۆيزيالىق بايگەسى جەڭىمپازدارىن ماراپاتتاۋ راسىمىندە قر اقپارات جانە قوعامدىق دامۋ ءمينيسترى ايدا بالاەۆا ايتتى, دەپ حابارلايدى Egemen.kz.
«تۇمار» ۇلتتىق تەلەۆيزيالىق بايگەسى جەڭىمپازدارىن ماراپاتتاۋ راسىمىنە قوش كەلدىڭىزدەر! بيىل V-ءشى رەت ءوتىپ وتىرعان بۇل جوبا جۇزدەن جۇيرىك شىققان جاڭا ەسىمدەردى جىل سايىن جاريالاپ, جالىندى تۇلعالار مەن تىڭ باستامالاردىڭ جاسامپاز جولىنا اينالدى. ءسوز جوق, بۇگىنگى تەلەۆيزيا – تەك اقپارات كوزى عانا ەمەس, بۇل ۇلتتىق يدەولوگيا مەن ءتالىم-تاربيەنىڭ قۇرالى. ال ەندى وسىناۋ ستراتەگيالىق ماڭىزى زور سالانىڭ بارىن باپتاپ, جوعىن جوقتاپ جۇرگەن – مىنا وزدەرىڭىز. ەندەشە, وسىنداي اۋقىمدى جوبالاردى باتىل قولعا الىپ, ولاردى بيىك ساپادا ورىنداپ جۇرگەن سىزدەرگە زور العىسىمدى بىلدىرگىم كەلەدى», دەدى مينيستر.
بۇدان وزگە, ۆەدومستۆو باسشىسى بيىلعى بايگە ەل تاۋەلسىزدىگىنىڭ 30 جىلدىعى اياسىندا ءوتىپ جاتقانىن تىلگە تيەك ەتتى.
«وزدەرىڭىز كۋا, وسى 30 جىلدىڭ ىشىندە ەل دامۋى مەن ۇلتتىق باق, سونىڭ ىشىندە تەلەۆيزيا سالاسى ۇلكەن وزگەرىستەردەن ءوتتى. قارقىندى دامىپ, ناتيجەلى بيىكتەردى باعىندىردى. بۇل ارينە, ەڭ الدىمەن تۇڭعىش پرەزيدەنت – ەلباسىمىزدىڭ اقپارات سالاسىندا قالىپتاستىرعان وڭ ساياساتىنىڭ ناتيجەسى, ەل باسشىلىعىنىڭ ۇدايى قولداۋىنىڭ ارقاسى. وتكەن 20-شى جىل ەلىمىز ءۇشىن ۇلكەن سىناق جىلى بولدى. الەمدىك پاندەميا باستالعاندا تىلشىلەر قاۋىمى سونىڭ ىشىندە تەلەجۋرناليستەر قاۋىمى ءومىرىن قاۋىپ-قاتەرگە ءتوندىرىپ, وعان قاراماستان كۇن دەمەي, ءتۇن دەمەي جۇمىس ىستەپ, حالىققا شىنايى اقپارات جەتكىزدى», دەدى ايدا بالاەۆا.
مينيستر وتكەن جىلى تەلەاۋديتوريا ءوسىمى 22 پايىزدى قۇراعانىن, وتاندىق تەلەۆيزيالىق ونىمگە سۇرانىستىڭ ارتقانىن ايتتى. الەمدىك جەتەكشى مەدياكومپانيالارمەن حالىقارالىق ىنتىماقتاستىق نىعايتىلىپ, قازاقستاندىق ونىمدەردى شەت ەلدەردە ىلگەرىلەتۋ جۇمىسى جانداندىرىلعاندىعىن اتاپ ءوتتى. سونىمەن قاتار رەسەي, تۇركيا, وزبەكستان, قىرعىزستان تەلەكومپانيالارىمەن بىرلەسكەن تەلەۆيزيالىق ءونىم شىعارۋ بويىنشا ۋاعدالاستىققا قول جەتكىزىلگەنىنە نازار اۋداردى.
«ارينە, بۇل – وسى ءبىر جىلدا اتقارىلعان كوپ جۇمىستىڭ ازعانتاي بولىگى عانا. ونىڭ ءبارىن قازىر ءتىزىپ ايتۋ مۇمكىن ەمەس. ەڭ باستىسى – بولاشاق باعدارىمىز انىق, جوسپارىمىز ايقىن. وكىنىشكە قاراي, قوعام ءالى دە الەمدىك پاندەميانىڭ ىقپالىندا. سوندىقتان «تۇمار» سىيلىعى بيىل 2-ءشى مارتە ونلاين فورماتتا ءوتىپ وتىر. بىل 48 وتاندىق تەلەۆيزيا وكىلىنە «تۇمار» بايگەسىنىڭ سىيلىعى تابىستالادى. ونىڭ اراسىندا تانىمال رەجيسسەرلەر مەن جۋرناليستەر, كاسىبي وپەراتورلار مەن ستسەناريستەر بار. ءسوز جوق, ولاردىڭ جاساعان جۇمىسى مەن جوبالارى وتاندىق تەلەۆيزيانىڭ باسەكەگە قابىلەتتىلىگىن ارتتىرىپ, كاسىبي دەڭگەيگە, جاڭا بيىككە كوتەرەدى دەپ سەنەمىز», دەدى مينيستر.
ايدا بالاەۆا ءسوز سوڭىندا بارشا قازاقستاندىقتاردى 7 مامىر – وتان قورعاۋشى كۇنىمەن جانە 9 مامىر – ۇلى جەڭىس مەرەكەسىمەن قۇتتىقتادى.
«ارينە, وتان قورعاۋ ۇعىمىنىڭ ماعىناسى تەرەڭ. شۇكىر بۇگىندە تىنىش زامان, بەرەكەلى ءومىر كەشۋدەمىز. دەسەدە, بەيبىت زاماننىڭ دا ءوز سىناقتارى مەن مىندەتى بار. وسى ورتاق ماقسات جولىندا قيىندىقتاردى بىرگە ەڭسەرىپ, جەتىستىكتەرگە بىرگە جەتەيىك», دەدى ول.