يسپانيانىڭ استاناسى – مادريدتە جۇلدە قورى 2 614 465 ەۆرونى قۇرايتىن تەننيسشىلەردىڭ حالىقارالىق ءتۋرنيرى جالعاسۋدا.
بۇعان دەيىن ءبىز ايەلدەر سايىسىندا سىنعا تۇسكەن ياروسلاۆا شۆەدوۆا مەن يۋليا پۋتينتسەۆانىڭ تۇساۋكەسەر كەزدەسۋلەرىندە ءسۇرىنىپ, ەلەنا رىباكينانىڭ ەكىنشى كەزەڭدە جەڭىلگەنى جايىندا جازعانبىز.
پيرنەي تۇبەگىندەگى سوڭعى ءۇمىتىمىز الەكساندر بۋبليك ەدى. العاشقى اينالىمدا ماجارستاندىق مارتون ءفۋچوۆيچتى ۇتقان ول ودان كەيىن دەنيس شاپوۆالوۆپەن كۇش سىناستى. يزرايلدە تۋىپ-وسكەن 22 جاستاعى ايتۋلى تەننيسشى بۇل كۇندەرى كانادانىڭ تۋى استىندا ونەر كورسەتۋدە. قازىرگى كەزدە ول اتر تىزىمىندە 13 ورىندى يەلەنۋدە. سول ساڭلاققا قارسى وتە ساۋاتتى ويناعان جەرلەسىمىز 6:4, 5:7, 6:4 ەسەبىمەن جەڭىسكە جەتتى.
ءۇشىنشى اينالىمدا الەكساندر بۋبليك ارگەنتينالىق ديەگو شۆارتسمان مەن رەسەيلىك اسلان كارتسەۆ اراسىنداعى كەزدەسۋدىڭ جەڭىمپازىمەن كۇش سىناسادى