سولتۇستىك قازاقستان وبلىستىق توتەنشە جاعدايلار دەپارتامەنتىنىڭ مالىمەتىنشە, جىل باسىنان بەرى وبلىستا 235 ءورت تىركەلدى. بىلتىر وسى ارالىقتا 16 ادام مەرت بولسا, بيىل 28 ادام قازا تاپتى, دەپ حابارلايدى Egemen.kz
34 تۇرعىن ءتۇرلى دەنە جاراقاتىن الدى. كەلگەن ماتەريالدىق شىعىن 97 ملن تەڭگەدەن اسادى. بارلىق ءورتتىڭ 75% جانە قازا تاپقانداردىڭ 27-ءسى – جەكە سەكتوردا بولعان. 23 ءساۋىر مەن 3 مامىر ارالىعىندا وڭىردە 29 ءورت تىركەلدى.
مامانداردىڭ ايتۋىنشا, ورتكە قاۋىپتى ماۋسىم 12 ساۋىردەن باستالدى. وسى ۋاقىتتان باستاپ كەپكەن ءشوپتى, قامىستى, قوقىستى كۇيدىرۋدەن تۋعان ورتكە قاتىستى 227 شاقىرتۋ تۇسكەن. وتتى ابايسىز قولدانۋ سالدارىنان, ياعني قوقىس پەن كەپكەن ءشوپتى كۇيدىرىپ, ول جاقىن ماڭداعى قۇرىلىس نىساندارىنا تارالعان 7 ءورت تىركەلدى.
«الدا بىرنەشە كۇن مەرەكە, دەمالىس. تۇرعىندار ساياجاي ۋچاسكەلەرىنە, دەمالۋ ءۇشىن ورمانعا, تابيعات اياسىنا اعىلادى. ارينە كاۋاپ دايىندايدى. كاۋاپ دايىنداعان ۋاقىتتا مىندەتتى تۇردە قاۋىپسىزدىك ەرەجەلەرىن ساقتاۋعا شاقىرامىز. جاقىندا اتا-انالار كۇنى بولادى, حالىق زيراتقا جيناۋعا بارادى. زيرات باسىندا وت جاعىپ, قوقىستى كۇيدىرۋگە قاتاڭ تۇردە تىيىم سالامىز», دەيدى وبلىستىق تجد باسقارماسىنىڭ باسشىسى دميتري راستيحين.
سقو-دا ورتكە قاۋىپتى ماۋسىمنىڭ باستالۋىنا وراي 46 ءموبيلدى توپ قۇرىلدى. وعان 230 ادام – ازاماتتىق قورعانىس ورگاندارىنىڭ وكىلدەرى, جەرگىلىكتى پوليتسيا قىزمەتىنەن, ورمان شارۋاشىلىقتارى مەن جەرگىلىكتى اتقارۋشى بيلىكتەن ماماندار كىرگەن. ولار جۇرگىزگەن رەيد بارىسىندا 20-دان استام اكىمشىلىك حاتتاما تولتىرىلدى.