8 مامىردا ۆەلوشاباندوزداردىڭ «دجيرو د’يتاليا» كوپكۇندىگى باستالادى. 112 جىلدىق تاريحا بار ايتۋلى جارىستىڭ جالاۋى بيىل 104-رەت جەلبىرەگەلى وتىر, دەپ حابارلايدى Egemen.kz
يتاليانىڭ تۋرين قالاسىنان باستاۋ الاتىن ءدۇبىرلى دودا بىرەر اپتاعا سوزىلىپ, 30-مامىردا ميلاندا ءوز مارەسىنە جەتەدى. سول ارالىقتا قاتىسۋشىلار اپەننين تۇبەگىنەن بولەك, سلوۆەنيا مەن شۆەيتساريانىڭ بىرقاتار ايماقتارىن باسىپ وتەدى. باعىتتىڭ جالپى ۇزاقتىعى – 3479,9 شاقىرىم. وسى جارىستا قازاقستاندا ىرگەتاسى قالانعان «Astana-Premier Tech» كلۋبىنىڭ ساپىندا ۆاديم پرونسكي (قازاقستان), سامۋەلە باتتيستەللا (يتاليا), الەكساندر ۆلاسوۆ (رەسەي), فابيو فەللينە (يتاليا), گوركا يساگيررە (يسپانيا), لۋيس لەون سانچەس (يسپانيا), ماتتەو سوبرەرو (يتاليا) جانە حارولد تەحادا (كولۋمبيا) سىندى ساڭلاقتار ونەر كورسەتەدى.
ەستەرىڭىزگە سالا كەتەيىك, بىلتىرعى «دجيرو د’يتاليا» دوداسىندا ۇلىبريتانيانىڭ «Ineos Grenadiers» كلۋبىنىڭ نامىسىن قورعاعان اۋستراليالىق ۆەلوشانبوز تەو گەيگان حارتتىڭ اسىعى الشىسىنان ءتۇستى. ەكىنشى جانە ءۇشىنشى ورىنداردى «Sunweb» كومانداسىنىڭ سەركەلەرى – نيدەرلاندتىق ۆيلكو كەلدەرمان مەن پورتۋگاليالىق جۋان پەدرۋ المەيدا يەلەندى.