كاتونقاراعاي اۋىلىنىڭ تۇسىندا قار بارىسى فوتوتۇزاققا ءىلىندى. سيرەك كەزدەسەتىن اڭ-قۇستا«ردى انىقتاۋ ءۇشىن بىلتىر سارىمساقتى جوتاسىنا ۇلتتىق پاركتىڭ ينسپەكتورلارى فوتوتۇزاق قۇرعان. ارشاتى جاقتا ءبىر ەمەس, بىرنەشە رەت فوتوعا تۇسكەن, دەپ حابارلايدى Egemen.kz
ءساۋىردىڭ باسىندا ينسپەكتورلار قۇرىلعان فوتوتۇزاقتى تەكسەرە وتىرىپ, ايۋ, كۇدىر, ۇلار, ءتيىن, قويان, قاسقىر, سىلەۋسىن, تاۋ ەشكىلەر تۇسكەنىن كورگەن. ال قار بارىسى سارىمساقتى جوتاسىندا بۇرىن-سوڭدى فوتوعا تۇسپەگەن.
فوتونىڭ انىقتاماسىنا زەر سالساڭىز, قار بارىسى 2020 جىلدىڭ 29 قازانىندا تۇندە تۇزاقتىڭ الدىنان ءجۇرىپ وتكەن. اپپارات كيەلى اڭدى 3 رەت ءتۇسىرىپ ۇلگەرگەن. سارىمساقتى جوتاسىنا فوتوتۇزاقتى كاتونقاراعاي مۇتپ جانۋارلاردى قورعاۋ جانە ءوڭدىرۋ ءبولىمى باستىعى ەرىك قاسىموۆ پەن ينسپەكتور داۋرەن تاۋدانبەكوۆ 2017 جىلدان بەرى قۇرىپ كەلەدى.
قۇرىلعىنى بارىس, تاۋ تەكە مەكەن ەتەتىندەي التايدىڭ باسىنا قۇرۋ وڭاي ەمەس. تاعىلاردىڭ سوقپاعىن تابۋ ءۇشىن 2000-3000 بيىك شاپشىما شىڭداردا جۇرۋگە تۋرا كەلەدى.
«تابيعاتتى قورعاۋ ماماندارىنىڭ ەڭبەگى مينيسترلىك تاراپىنان كاتونقاراعاي مەملەكەتتىك ۇلتتىق تابيعي پاركىنىڭ 20 جىلدىعى قارساڭىندا ءتيىستى باعالانسا دەپ ويلايمىز. قار بارىسىن التاي تاۋلارىندا العاش رەت 2014 جىلى تۇسىرگەنبىز. 2015-2016 جىلدارى بىرنەشە مارتە تۇسكەن. قار بارىسىن انىقتاۋ جۇمىستارىنا پارك ديرەكتورى جانبولات تىنىبەكوۆ ۇنەمى قولداۋ كورسەتىپ كەلەدى»,دەيدى پارك قىزمەتكەرى ەرىك قاسىموۆ.