قىرعىزستان-تاجىكستان شەكاراسىندا باتكەن اۋدانىنىڭ كوك-تاش اۋىلىندا قارۋلى قاقتىعىس بولدى, دەپ حابارلايدى Egemen.kz informburo.kz سايتىنا سىلتەمە جاساپ.
تاجىكستان تاراپىنىڭ مالىمەتىنشە, 29 ساۋىردە ساعات 13:05-تە حودجاي الو دجامواتا چوركۋح اۋىلىنىڭ ماڭىنداعى يسفارى وزەنىنىڭ جوعارعى اعىسىندا ورنالاسقان «گولوۆنىي» سۋ تاراتۋ پۋنكتىنىڭ ۋچاسكەسىندە قىرعىزستاننىڭ اسكەري قىزمەتشىلەرى تاجىكستان شەكارا قىزمەتشىلەرىنە وق جاۋدىرعان.
«سۋ تاراتۋ پۋنكتىنىڭ ۋچاسكەسىندەگى وقيعا قىرعىز تاراپىنىڭ تاجىكستانمەن بۇرىن قول جەتكىزىلگەن ەكىجاقتى كەلىسىمدەردى بۇزۋىمەن بايلانىستى. وندا كورشى ەل سۋ تاراتۋ پۋنكتىن زاڭسىز باسىپ الۋ ارەكەتتەرىن جۇزەگە اسىرعان. 1924-1927 جىلدارداعى, سونداي-اق 1989 جىلعى كارتالارعا سايكەس بۇل نىسان تولىعىمەن تاجىكستان رەسپۋبليكاسىنا تيەسىلى. 1968 جىلدان باستاپ تاجىكستان, قىرعىزستان جانە وزبەكستان رەسپۋبليكالارىنىڭ شەكارالاس اۋداندارىن سۋارۋ جانە سۋمەن جابدىقتاۋ ءۇشىن پايدالانىلدى», دەلىنگەن تاجىكستان ۇقك شەكارا اسكەرلەرىنىڭ ءباسپاسوز ورتالىعىنىڭ حابارلاماسىندا.
قىرعىز رەسپۋبليكاسىنىڭ شەكارا قىزمەتى تاراپىنان ازىرگە وقيعا تۋرالى رەسمي اقپارات جوق. قازىر قر ۇقك توراعاسى قامشىبەك تاشيەۆ ەلدەن تىس جەردە. ول Facebook-تە گەرمانيادان قىرعىزستانعا شۇعىل تۇردە ۇشقانىن جازدى.
«كەشە تاڭەرتەڭ گەرمانياعا ەمدەلۋگە ۇشىپ كەتكەن ەدىم. بىراق بۇگىن باتكەندەگى وقيعالارعا بايلانىستى اۋرۋحاناعا جەتپەي, قىرعىزستانعا قايتىپ بارامىن. ەلگە تۇندە جەتەمىن», دەپ جازدى قامشىبەك تاشيەۆ.