بۇگىن مادەنيەت جانە سپورت ءمينيسترى اقتوتى رايىمقۇلوۆا قولجازبالار جانە سيرەك كىتاپتار ۇلتتىق ورتالىعىنا ارنايى كەلىپ, سالا قىزمەتكەرلەرىمەن كەزدەستى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
كەزدەسۋگە مادەنيەت جانە سپورت ءمينيسترىنىڭ كەڭەسشىسى ەرلان جۇرىنباەۆ, ارحيۆ ءىسى جانە قۇجاتتاما دەپارتامەنتىنىڭ ديرەكتورى باعدات تانسىبەكوۆ, ۇلتتىق ارحيۆ ديرەكتورى ساعيلا نۇرلانوۆا, ۇلتتىق ورتالىق ديرەكتورى مالىك وتارباەۆ باستاعان ۇجىم قاتىستى.
– ۇلتتىق ورتالىقتىڭ دا, مۇراعاتتىڭ دا جۇمىسى كۇردەلى. ءبىز مەملەكەت تاراپىنان عيماراتتاردى ۇلكەيتىپ, كىتاپتار ساقتايتىن قوردى ۇلعايتۋ باعىتىندا جۇمىس ىستەپ جاتىرمىز, - دەپ باستاعان اڭگىمەسىن اقتوتى راحمەتوللاقىزى: «وزدەرىڭىز دە بىلەسىزدەر, 20 جىل بويى مادەنيەت پەن مۇراعات سالاسى ماماندارىنىڭ جالاقىسى وسپەگەن ەدى. 2020 جىلى جالاقىنى 50 پايىزعا وسىردىك. بيىل دا بۇل باعىتتا جۇمىس ىستەپ جاتىرمىز. ءبىز قازىر «قازاقستان يپوتەكالىق كومپانياسى» وكىلدەرىمەن كەڭەسىپ, مادەنيەت سالاسى ماماندارىنىڭ جالاقىسىنا وراي نەسيەلىك جوبالارعا قاتىسۋ ماسەلەسىن قاراستىرىپ جاتىرمىز. ولار وسى سالالار ءۇشىن پايىزدىق مولشەرلەمەلەرىن تومەندەتسە دەيمىز. بيىلدان باستاپ نۇر-سۇلتان, الماتى, پاۆلودار, قاراعاندى, اقتوبە سياقتى قالالاردا وسى باعدارلامانىڭ كەڭىنەن جۇزەگە اسۋىنا اتسالىسىپ كەلەمىز. جاستار ۇلتتىق ورتالىق, مۇراعات, كىتاپحانالارعا كەلسىن دەگەن نيەتتەن تۋعان باستامالار بۇل» , - دەدى.
2017 جىلى قۇرىلعان قولجازبالار جانە سيرەك كىتاپتار ۇلتتىق ورتالىعىندا 11000 استام كىتاپ قورى ساقتالعان.
ءوز كەزەگىندە ورتالىق ديرەكتورى مالىك وتارباەۆ مينيسترگە العىس بىلدىرە وتىرىپ, رەستاۆراتسيالىق زەرتحانانىڭ ماڭىزىنا ەرەكشە توقتالدى. ءبىر ايتا كەتەرلىگى, استانادا مۇنداي زەرتحانا تەك ۇلتتىق ورتالىقتا عانا بار. مۇندا ماماندار سيرەك جانە كونە كىتاپتاردى قايتا قالپىنا كەلتىرىپ, قورعا تابىستايدى.
رەستاۆراتور مامان سىرىم بوتابەكوۆ مينيسترگە ءوز جۇمىسىن تانىستىرۋمەن قاتار, سالادا قوردالانعان ماسەلەلەردى ازدى-كەمدى ايتىپ ءوتتى. بۇل تۇستا بيىل بيۋدجەتتەن ءتورت زەرتحانانى قولداپ, قۇرال-جابدىقتارمەن قامتۋ جۇمىستارى ارى قاراي دا جالعاساتىنى بەلگىلى بولدى.
ۇلتتىق ورتالىق ديرەكتورى مالىك نۇرجان ۇلى: – كىتاپتار قورى كۇن وتكەن سايىن تولىعىپ جاتىر. بۇل قۋانتارلىق ءجايت. ەلوردا تۇرعىندارى كورمە زالىن كورۋگە ارنايى كەلەدى. وقۋ زالىندا جالپى قورداعى كىتاپتاردىڭ 60 پايىزى ساقتالعان. كۇنىنە كەمىندە 10 ادام, جاس عالىمدار مەن وقىرماندار كەلىپ, قاجەتتى مالىمەتىن الىپ, زەرتتەۋ جۇمىستارىن جۇرگىزە بەرەدى, - دەدى.
كەزدەسۋ سوڭىندا مادەنيەت جانە سپورت ءمينيسترى اقتوتى رايىمقۇلوۆا ۇلتتىق ورتالىق قىزمەتكەرلەرىنە تابىس تىلەي وتىرىپ, ارنايى كىتاپقا ىزگى تىلەگىن جازىپ, قولتاڭباسىن قالدىردى. مالىك نۇرجان ۇلى مينيسترگە تۇرىك اقىنى يۋنۋس ەمرەنىڭ قازاق تىلىنە اۋدارعان جىر جيناعىن سىيعا تارتتى.