قازاقستاندىق فۋتبول كۇنىنە وراي ۆەلوترەك ستاديونىنىڭ فۋتبول الاڭىندا شاعىن فۋتبولدان اۋەسقويلار اراسىندا تۋرنير ءوتتى, دەپ حابارلايدى Egemen.kz مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
جارىسقا فيزيكالىق دايىندىعى بار كەز-كەلگەن 18-35 جاس ارالىعىنداعى ازاماتتار قاتىستى. اتالعان ويىنداردىڭ ەرەكشەلىگى ءبىر ۋاقىتتا ەرلەر مەن ايەلدەر ءتۋرنيرىنىڭ ءوتۋى. الاڭعا 8 كوماندا شىقتى, ونىڭ ەكەۋى ايەلدەر كومانداسى.
شارانىڭ ۇيىمداستىرۋشىلارى FITCAMP جاستار قوزعالىسىنىڭ بەلسەندىلەرى.
جوبا بۇقارالىق سپورتتى دامىتۋعا باعىتتالدى. باعدارلاماعا: دەنە جاتتىعۋى, فلەش-موب, بەلسەندى ويىندار, شاعىن فۋتبول كىردى.
شارانىڭ اشىلۋىنا مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى توراعاسى سەرىك ساپيەۆ قاتىستى. ول ەلىمىزدە بۇقارالىق سپورتتىڭ قارقىندى دامىپ كەلە جاتقاندىعىن ايتىپ, قاتىسۋشىلارعا ساتتىلىك تىلەدى.