اقوردادا بىرقاتار مەملەكەتتىڭ جاڭادان تاعايىندالعان توتەنشە جانە وكىلەتتى ەلشىسىنىڭ قازاقستان پرەزيدەنتىنە سەنىم گراموتالارىن تابىستاۋ ءراسىمى ءوتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆقا ۋگاندا رەسپۋبليكاسىنىڭ ەلشىسى دجونسون اگارا ولۆا, زامبيا رەسپۋبليكاسىنىڭ ەلشىسى شەدرەك چينگەمبۋ لۋۆيتا, مالديۆتەر رەسپۋبليكاسىنىڭ ەلشىسى ومار ابدۋل راززاك, كورەي حالىق دەموكراتيالىق رەسپۋبليكاسىنىڭ ەلشىسى حون چحول سين, ليۋكسەمبۋرگ ۇلى گەرتسوگتىگىنىڭ ەلشىسى جورج كاميل ادولف فابەر, يسلانديا رەسپۋبليكاسىنىڭ ەلشىسى اۋرني تور سيگۋردسسون, چەرنوگوريانىڭ ەلشىسى ميلوراد شچەپانوۆيچ سەنىم گراموتاسىن تابىستادى.
قازاقستان پرەزيدەنتى ەلشىلەردى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ, ەكىجاقتى بايلانىستاردى ودان ءارى نىعايتۋعا باعىتتالعان جۇمىستارىنا تابىس تىلەدى.
– قازاقستان حالىقارالىق ىنتىماقتاستىقتى دامىتۋدى قولدايدى. ءبىز حالىقارالىق ارەنادا «ۇلكەن ويىن» ويناۋدى ەمەس, قايتا سىزدەردىڭ ەلدەرىڭىزبەن بىرلەسە وتىرىپ «ۇلكەن ناتيجەگە» قول جەتكىزۋدى ويلايمىز. بولاشاقتا ءارتۇرلى سالالار بويىنشا ىقپالداستىقتى ارتتىرامىز دەپ سەنەمىن. قازاقستان سىزدەردىڭ مەملەكەتتەرىڭىزبەن ەكىجاقتى فورماتتا دا, حالىقارالىق ۇيىمدار شەڭبەرىندە دە تىعىز قارىم-قاتىناس ورناتۋعا بەيىلدى ەكەنىن جەتكىزەرسىزدەر, – دەدى مەملەكەت باسشىسى.
سالتاناتتى ءراسىم سوڭىندا قازاقستان پرەزيدەنتى ۋگاندا, زامبيا, مالديۆتەر, قحدر, ليۋكسەمبۋرگ, يسلانديا جانە چەرنوگوريا كوشباسشىلارىنا ءوزىنىڭ سالەمىن جولداپ, تىلەكتەستىگىن ءبىلدىردى.