قاراعاندى وبلىسىنداعى بۇقار جىراۋ اۋدانىنىڭ اكىمى بولىپ سەرجان ايماقوۆ تاعايىندالدى, دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.
سەرجان جاڭابەك ۇلى ايماقوۆ 1961 جىلى قارقارالى قالاسىندا دۇنيەگە كەلگەن. ەكى جوعارى ءبىلىمى بار: قاراعاندى پوليتەحنيكالىق ينستيتۋتىن جانە زاماناۋي گۋمانيتارلىق ينستيتۋتتى تامامداعان.
1989 جىلدان باستاپ مەملەكەتتىك قىزمەتتە. ءتۇرلى لاۋازىمداردى اتقارعان. 90-جىلدارى قارقارالى قالاسى اكىمىنىڭ ورىنباسارى بولدى, قارقارالى اۋداندىق سالىق كوميتەتىنىڭ توراعاسى قىزمەتىن اتقاردى.
2000-2007 جىلدارى قارقارالى اۋدانى اكىمىنىڭ ورىنباسارى بولىپ قىزمەت ەتتى. كەيىن قاراعاندى وبلىسىنىڭ قۇرىلىس باسقارماسى باستىعىنىڭ ورىنباسارى بولدى.
سونداي-اق, قارقارالى جانە وساكاروۆ اۋداندارىنىڭ اكىمى بولىپ جۇمىس ىستەگەن. 2015 جىلدان باستاپ وسى ۋاقىتقا دەيىن شاحتينسك قالاسىنىڭ اكىمى قىزمەتىن اتقاردى.
ال شاحتينسك قالاسى اكىمى بولىپ بۇعان دەيىن قاراعاندى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قىزمەتىن اتقارعان اسكەربەك حالتونوۆ تاعايىندالدى.