بۇگىن ۇكىمەت وتىرىسىندا دەنساۋلىق ساقتاۋ ءمينيسترى الەكسەي تسوي ەلىمىزدە كوروناۆيرۋستىڭ تارالۋى تومەندەپ كەلە جاتقانىن ايتتى, دەپ حابارلايدى Egemen.kz.
«ناۋقاستانۋدىڭ كۇندەلىكتى ديناميكاسى ناۋرىز ايىنىڭ سوڭىنداعى كورسەتكىشپەن سالىستىرعاندا وتكەن اپتا ىشىندە 8 پايىزعا دەيىن تومەندەدى. سوڭعى اپتادا ونىڭ الدىنداعى اپتامەن سالىستىرعاندا ءولىم-ءجىتىم ءوسىمى 30-دان 8 پايىزعا دەيىن ازايدى. احۋالدىڭ ايتارلىقتاي تۇراقتانۋى بايقالادى. وڭىرلەر ايماقتاعى ەپيدەميالىق احۋالدى ەسكەرە وتىرىپ شەكتەۋ ءىس-شارالارىن تۇزەتۋدى جانە قابىلداۋدى جالعاستىرىپ جاتىر», دەدى ا. تسوي.
ءمينيستردىڭ ايتۋىنشا, پاندەميا باستالعالى ەلىمىزدە 311 400 ادام كوروناۆيرۋس ينفەكتسياسىن جۇقتىردى.