ءبىر ورىندا بايىز تاۋىپ وتىرا المايتىن مىنا اسپاننىڭ بۇلتىن ايتام دا, وسى جىلى ادەتتەگىدەي ەمەس. كوز جاسى تاۋسىلعانداي. قاراشىعى تولسا دا جىلامايدى. ء«وزىم شولدەگەم جوق, جۇرەگىم شولدەدى». جارىقتىق ەسەنعالي راۋشانوۆ كورسە وسىلاي دەۋشى ەدى-اۋ. بىراق... قارا جەردە قىڭق ەتپەيدى عوي تەگى, قارا سۋىققا ەتى ۇيرەنگەندەي. بۇرىنعىداي ەمەس ادامدار دا ءبىر-بىرىنە سالقىن. ۋاقىت اسىقتىرعانىمەن بۇگىن-ەرتەڭ كوكتەم كەلمەيتىن شىعار. مۇمكىن كەلەر, كەلسە دە اقىننىڭ مۇڭلى ولەڭى بولىپ قانا. ويتكەنى بۇل كوكتەمنىڭ قايعىسى اۋىر. ودان دا ءبىز ونى سۋرەتشىنىڭ ساعىنىشىنان ىزدەيىكشى.
تاۋعا شىعىپ قايتۋعا قالاي قارايسىز. ەندىگى الىپ شىڭدار اقجاۋلىعىن شەشكەن بولار. الىستان قاراساڭىز بويجەتكەن قاراعايلار مەن بوزبالا بۇلاقتار بوزدونەن بۇلتتاردىڭ باۋىرىنا تىعىلىپ جاتقان سىڭايلى. ەتەگىندەگى گۇلزار باق ۇيقىدان ويانعان شىعار. ءجۇرشى, كورىپ قايتايىق؟!
كوكتەمنىڭ ءيىسى, كوڭىلدىڭ حوشى اڭقىعان كوركەم كارتينا. كورگىڭىز كەلسە ۇلتتىق مۋزەيگە بارىڭىز. الدىڭىزدان مەنمۇندالاپ كوكتەم شىعادى. ەشكىم جوعالماعانداي, ەشتەڭە وزگەرمەگەندەي. جان دۇنيەڭىز ءبىر بالقيتىنى انىق. قىلقالام شەبەرى جاڭاتاي شاردەنوۆتىڭ «تاۋ بوكتەرىندەگى گۇلدەنگەن باق» تۋىندىسى مەرەيلى مەزگىلدىڭ مەيىرىمىن توگەدى. ءبىز ۇمىتا باستاعان اياۋلى ساتتەرگە قايتا ەرتىپ اپاراتىن سەكىلدى.
بۇل سۋرەتتىڭ قۇپياسى نەدە دەيسىز عوي؟ مۇندا ءبىر ۇلكەن ساعىنىش بار. سۋرەتشى رەسەيدەگى لەنينگراد كەسكىندەمە, ءمۇسىن جانە ساۋلەت ينستيتۋتىندا وقىعان. بىرنەشە جىل ماسكەۋدە ءبىلىمىن جەتىلدىرەدى. سودان دا بولار شەتتە جۇرگەندە ونىڭ تۋعان جەرگە ساعىنىشىن سويلەتكەن پەيزاج توپتامالارى جازىلادى. اڭسارعا تولى اسقاق بەينەلەر سان الۋان بوياۋعا ۇلاسادى. ءسويتىپ شىعارماشىلىق جولى بۇتىندەي سول باعىتقا بۇرىلدى. مىنە, ءدال وسى جانردان شەبەردىڭ قولتاڭباسى انىق بايقالدى.
ول ءوز شىعارماشىلىعىنا يمپرەسسيونيستىك باتىل ءتۇس ەرەجەلەرىن جانە قىلقالامنان بولەك, قالاقشانى پايدالانىپ پاستانى جالپاق ەتىپ جاعۋ تەحنيكاسىن ەنگىزدى. اۆتوردىڭ اسقان شەبەر تەحنيكاسى رەڭك ەرەكشەلىكتەرىنىڭ بالامالارىن اسا سەزىمتالدىقپەن مەڭگەرۋگە مۇمكىندىك بەرگەنى سونداي, پەيزاجدارى كادىمگىدەي تىنىس الىپ, حوش ءيىس توگەدى. اۋا كەنەپ بەتىمەن قالىقتاپ, ءتىپتى تابيعات تىنىسى ءاربىر فراگمەنتتەن سەزىلەدى.
«تاۋ بوكتەرىندەگى گۇلدەنگەن باق» كارتيناسى – شەبەردىڭ الماتى ماڭايىندا سالعان پەيزاجدار توپتاماسىنىڭ ءبىرى. سىزىقتارىنىڭ تازالىعى مەن بوياۋلارىنىڭ وتكىرلىگى جاعىنان ەرەكشە كوز تارتادى. ىلە الاتاۋىنىڭ شىڭىندا اق قار ءالى دە جاتىر. ارا-اراسىندا قارايعان جەرلەردىڭ سۇلباسى كورىنەدى. تاۋ بوكتەرىندە گۇلدەگەن ورىكتەر مەن كوگەرىپ ءوسىپ كەلە جاتقان ءارتۇرلى گۇلدەردىڭ نازىك شىمىلدىعى شۋاقتى مەزگىلدىڭ كەلگەنىن حابارلاپ تۇرعانداي. وقىرماندى وزىنە ەلىتىپ الادى.
بۇل كوكتەم دە ادامزاتتىڭ العاشقى كوكتەمى سياقتى. ءۇمىت ارتاسىڭ, ارعى ءومىرىڭدى جوسپارلايسىڭ, كەلەشەككە جارقىن كوزقاراسپەن قارايسىڭ. سونىسىمەن ىستىق, كوڭىلگە مەدەت. تابيعاتتان ۇيرەنەتىن نارسەمىز كوپ. كارتينا سونى مەڭزەپ تۇرعانداي. جاڭا ءومىردىڭ باستاۋى سەكىلدى.