پرەزيدەنت قاسىم-جومارت توقاەۆ پرەمەر-مينيستر اسقار مامين مەن دەنساۋلىق ساقتاۋ ءمينيسترى الەكسەي تسويدى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
مەملەكەت باسشىسىنا ەلىمىزدەگى سانيتارلىق-ەپيدەميولوگيالىق احۋال, حالىققا ۆاكتسينا سالۋ بارىسى, رەسپۋبليكانىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرى جايىندا باياندالدى.
قاسىم-جومارت توقاەۆقا حالىققا ەكپە ەگۋگە قاتىستى قابىلدانىپ جاتقان شارالار جايىندا ايتىلدى. اسقار ءماميننىڭ ايتۋىنشا, ساۋىردەن باستاپ اي سايىن 2 ميلليون ادامعا ۆاكتسينا سالۋ جوسپارلانىپ وتىر.
پرەزيدەنتكە وتاندىق QAZVAC ۆاكتسيناسىنىڭ وڭىرلەرگە جەتكىزىلۋى جايىندا اقپارات بەرىلدى. پرەمەر-مينيستر قازاقستاننىڭ COVID-19 ىندەتىنە قارسى ۆاكتسينا شىعارعان ون مەملەكەتتىڭ جانە ءوز ازىرلەمەلەرىن تىركەگەن بەس ەلدىڭ قاتارىنا كىرگەنىن ايتتى. سونىمەن قاتار ول 26 ساۋىردەن باستاپ «ASHYQ» قوسىمشاسىن بارلىق وبلىستار كەڭ كولەمدە قولدانىلا باستايتىنىن اتاپ ءوتتى. بۇل «قىزىل» جانە «سارى» ايماق كەزىندە ەكونوميكانىڭ ءارتۇرلى سەكتورىنىڭ قاۋىپسىز جۇمىس ىستەۋىنە مۇمكىندىك بەرمەك.
مەملەكەت باسشىسىنا بەرىلگەن اقپاراتتارعا سايكەس, جۇقپالى اۋرۋلار اۋرۋحاناسىنداعى ورىندار 42 پايىزعا, جان ساقتاۋ بولىمدەرى 28 پايىزعا تولىق. ءدارى-دارمەكتىڭ, جەكە قورعانىس قۇرالدارىنىڭ قاجەتتى قورى جاساقتالعان, پتر-زەرتحانالارى كۇنىنە 123 مىڭ ادامعا دەيىن قىزمەت كورسەتە الادى. 25 مىڭ توسەك-ورىن قورى بار, بارلىق وڭىردە زاماناۋي قۇرالدارمەن جابدىقتالعان جاڭا جۇقپالى اۋرۋلار اۋرۋحانالارى جۇمىس ىستەپ جاتىر.
اسقار مامين قاسىم-جومارت توقاەۆقا 29-30 ءساۋىر كۇندەرى وتەتىن ەۋرازيالىق پارلامەنتارالىق كەڭەستىڭ وتىرىسىنا دايىندىق بارىسىن باياندادى. سونىمەن قاتار ينۆەستيتسيا تارتۋ, حالىقتى جۇمىسپەن قامتۋ ماسەلەلەرى دە قاراستىرىلدى.
كەزدەسۋ سوڭىندا پرەزيدەنت ۇكىمەتكە وتاندىق ۆاكتسينا ءوندىرىسىن ارتتىرۋدى جانە ونىڭ حالىققا قول جەتىمدى بولۋىن ەرەكشە باقىلاۋدا ۇستاۋدى تاپسىردى.