«سارى ايماقتا» ءبىر-اق تاۋلىك بولعان ءوڭىر قايتادان جامان تۇماۋدىڭ باس كوتەرۋىنە بايلانىستى «قىزىل ايماق» قاتارىنا ءوتتى. كارانتيندىك شارالار ءىشىنارا كۇشەيتىلۋدە. وسىعان وراي قامقورلىق شارالارى دا ۇزىلمەۋى ءتيىس. جاقسى مىسال دا از ەمەس. جارقايىڭنىڭ جومارتتارى قايىرىمدىلىق قاعيداتتارىن ساباقتاستىرىپ, وزگەگە ونەگە بولىپ-اق تۇر.
ەل ىشىندەگى جالعىزىلىكتى, قامقورلىققا ءزارۋ ادامدار قازىر جالپىعا ورتاق قيىندىقپەن بەتپە-بەت كەلگەن كەزدەرىندە جالعىز ەمەس ەكەندىكتەرىن سەزىنۋى كادىمگىدەي قامكوڭىلگە دەمەۋ. وتكەن جىلدىڭ باسىنان باستاپ قاناتىمەن سۋ سەپكەن قارلىعاشتاي وڭىردەگى كوپ بالالى وتباسىلارىن, مۇمكىندىگى شەكتەۋلى ادامداردى قامقورلىقتارىنا الىپ, قارايلاسقان ەرىكتىلەر توبى 194 شارا وتكىزگەن ەكەن. ونىڭ بارلىعى جوعارىدا اتالعان توپتى الەۋمەتتىك جاعىنان ۇزدىكسىز قولداپ, قولتىعىنان دەمەۋ.
جاڭا جىلدان بەرى جۇرەك جىلۋى سەزىلىپ تۇراتىن مازمۇندى 20 شارا وتكىزىلگەن. ايتالىق «ارداگەرلەردى ارداقتايىق» جوباسى وتە ءتيىمدى بولعانىن كوپشىلىك اۋزىنان تاستاماي ايتىپ وتىر. ىزگىلىك الاۋىمەن نۇرلانعان شارا بارىسىندا اۋدانداعى ەلۋگە تارتا قارياعا قولۇشى بەرىلىپتى. ەرىكتىلەر ولاردىڭ قىسقا دايىندالۋىنا كومەكتەسكەن. وتىندارىن جارعان, كومىرلەرىن تاسىپ بەرگەن, باسپانالارى مەن قورا-قوپسىسىن جوندەگەن. ال قاقاعان قىستا اۋلالارىن قاردان تازارتقان, سۋ تاسىپ بەرگەن. دەنساۋلىقتارىنا بايلانىستى قارعا ادىم جەر اتتاپ باسۋ مۇڭ بولىپ وتىرعان قاريالار قولعاناتقا جارىپ-اق قالعان.
كارانتين كەزىندە كاسىپكەرلەر مەن حالىق قالاۋلىلارى ەل قينالىپ قالماسىنشى دەيتۇعىن ىزگى نيەتتىلەر بىرلەسە وتىرىپ, اۋرۋحاناداعى جالعىزىلىكتى جاندارعا ازىق-ت ۇلىكتەرى مەن ءدارى-دارمەكتەرىن جەتكىزگەن. ەسەپتە تۇراتىن سوزىلمالى سىرقاتى بارلار دا نازاردان تىس قالماپتى.
قازىرگى زامانعى تەحنولوگيالىق مۇمكىندىك تە بىرلىكتىڭ تامىرى بەكي تۇسۋىنە سەپتىگىن تيگىزىپ وتىر. ماسەلەن, jarkain.live ينستراگرام جوباسىن قولعا العان كارينا شىنبولات, ءادىل نۇربەكوۆ, پاۆەل ستەفانيۋك ءتارىزدى جاستار ارنايى ەسەپشوت اشىپ, قارجى جيناعان. نەبارى ءبىر ايدىڭ ىشىندە 1 ملن 300 مىڭ تەڭگە قاراجات تۇسكەن. جاناشىرلاردان جينالعان قارجى جامان تۇماۋمەن الىسىپ جاتقان اۋرۋحانانىڭ كەرەك-جاراعىنا جۇمسالعان. وسى ارادا ەرىكتىلەر اۋدان بويىنشا حالىققا كومەك كورسەتۋ ءۇشىن 12 ملن-عا تاياۋ قاراجات جيناعاندىعىن ايتا كەتۋىمىز كەرەك.
Nur Otan پارتياسىنىڭ جارقايىڭ اۋداندىق فيليالى وكىلدەرى مەن ەرىكتىلەر بىرلەسە وتىرىپ, رەسپۋبليكالىق ء«بىز بىرگەمىز» اكتسياسى اياسىندا اۋدانداعى 440 وتباسىنا 7,5 ملن تەڭگە كولەمىندە كومەك كورسەتكەن.
جاستار رەسۋرستىق ورتالىعى ەرىكتىلەرمەن قويان-قولتىق جۇمىس ىستەپ, حالىقتى ساقتاندىرۋ باعىتىندا قىرۋار جۇمىس اتقاردى. قوعامدىق جەرلەردە ساقتىق شارالارىنىڭ بۇلجىماي ورىندالۋىن كوزدەن تاسا ەتكەن جوق. اۋرۋدىڭ الدىن الۋ باعىتىنداعى ءىس-شارالار ونلاين تۇرىندە ۇدايى جۇزەگە اسىرىلدى.
قازىر اۋداندا «قايىرىمدى ىستەر» ەستافەتاسى قولعا الىنعان. كارانتين شاراسى كۇشەيتىلۋىنە بايلانىستى قامقورلىققا ءزارۋ جاندار نازاردان تىس قالمايتىن بولادى.
اقمولا وبلىسى,
جارقايىڭ اۋدانى