وتكەن جىلى مەملەكەت باسشىسى قاسىم-جومارت توقاەۆ وتاندىق ۆاكتسينانى جاساۋ بويىنشا ناقتى تاپسىرمالار بەرگەن بولاتىن. پرەزيدەنت تاپسىرماسىنا سايكەس, قازاقستان رەسپۋبليكاسى پرەمەر-ءمينيسترىنىڭ ورىنباسارى ەرالى توعجانوۆ جامبىل وبلىسىنىڭ قورداي اۋدانىنا كەلدى.
وڭىرگە جۇمىس ساپارى بارىسىندا ۇكىمەت باسشىسىنىڭ ورىنباسارى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بازاسىندا وندىرىلگەن «QazVac» (QazCovid-in) قازاقستاندىق ۆاكتسيناسىنىڭ ءبىرىنشى پارتياسىنىڭ جونەلتىلۋىنە قاتىستى. سونىمەن قاتار, قورداي اۋدانى گۆاردەيسكي كەنتىندەگى بيوفارماتسەۆتيكا زاۋىتىنىڭ جۇمىسىمەن تانىستى.
«قازاقستاندىق ۆاكتسينانىڭ جاسالۋى – ءبىزدىڭ ەلىمىزدىڭ كوروناۆيرۋس ينفەكتسياسىنا قارسى ءوز ۆاكتسينالارىن ازىرلەگەن الەمنىڭ بەس ەلىنىڭ قاتارىنا ەنۋىنە مۇمكىندىك بەردى. بۇل تەك حالىقتىڭ دەنساۋلىعىنا عانا قاتىستى ماسەلە ەمەس. سونداي-اق, وتاندىق عىلىمنىڭ الەۋەتى مەن بيوفارماتسەۆتيكادا زاماناۋي تەحنولوگيالاردى ءىس جۇزىندە قولدانۋدىڭ, مەملەكەتتىڭ بەدەلىنىڭ دالەلى», دەدى ەرالى توعجانوۆ. سونىمەن قاتار, ۆيتسە-پرەمەر مەملەكەت باسشىسى قاسىم-جومارت توقاەۆتىڭ قازاقستاندىق ۆاكتسينانى شىعارۋ جونىندەگى بارلىق تاپسىرمالارى ۇكىمەتتىڭ ەرەكشە باقىلاۋىندا ەكەنىن جانە ۆاكتسينانىڭ ءبىرىنشى پارتياسىنىڭ بۇگىنگى شىعارىلۋى ولاردىڭ ءىس جۇزىندە ورىندالعانىن ايعاقتايتىنىن اتاپ ءوتتى.
كەزدەسۋدە «QazVac» ۆاكتسيناسىنىڭ العاشقى 50 مىڭ دوزاسى «سق-فارماتسيا» جاۋاپكەرشىلىگى شەكتەۋلى سەرىكتەستىگىنىڭ حابتارىنا تاراتىلىپ, ودان ءارى ەلىمىزدىڭ بارلىق وڭىرلەرىندەگى دەنساۋلىق ساقتاۋ باسقارمالارىنىڭ قويمالارىنا جەتكىزىلەتىنى دە ايتىلدى.
2021 جىلعى 26 ساۋىردە حالىقتى «QazVac» ۆاكتسيناسىمەن ۆاكتسيناتسيالاۋ باستالادى. ال, الداعى مامىر ايىندا 50 مىڭ دوزا كولەمىندەگى ۆاكتسينانىڭ كەزەكتى پارتياسىن شىعارۋ جوسپارلانۋدا ەكەن. بۇدان ءارى ۆاكتسينا ءوندىرىسى كەزەڭ-كەزەڭىمەن ايىنا 500-600 مىڭ دوزاعا دەيىن ۇلعايتىلاتىن بولادى. وتاندىق ۆاكتسينا دۇنيەجۇزىلىك دەنساۋلىق ساقتاۋ ۇيىمىنىڭ تىزىلىمىنە دە ەنگىزىلگەن. ونىڭ تولىق قاۋىپسىزدىگى دالەلدەنگەن. اتالعان ۆاكتسينا كوروناۆيرۋس ينفەكتسياسىنا قارسى تۇراقتى يممۋنيتەتتى قالىپتاستىرادى. يناكتيۆتەندىرىلگەن ۆاكتسينانىڭ ارتىقشىلىعى – ول ۆاكتسينامەن بايلانىستى اۋرۋلاردى تۋدىرمايدى. بۇدان بولەك, «QazVac» ۆاكتسيناسىن جەتكىزۋ ادىستەرى كۇردەلى توڭازىتقىش قوندىرعىلارىن تالاپ ەتپەيدى. ولار توڭازىتقىشتا +2-8 گرادۋس تەمپەراتۋرادا تاسىمالدانادى.
بۇگىندە بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى جانىنداعى بيوفارماتسەۆتيكا زاۋىتىندا قۇرىلىس-جوندەۋ جانە ارلەۋ جۇمىستارى اياقتالعان. ينجەنەرلىك جەلىلەرگە قوسۋ ارقىلى جابدىقتاردى مونتاجداۋ, قوسۋ-باپتاۋ جانە ىسكە قوسۋ بويىنشا جۇمىستار جۇرگىزىلۋدە. بيىلعى جىلعى ناۋرىز ايىندا زەرتتەۋدىڭ GMP ستاندارتتارىنا سايكەستىگى تۋرالى وڭ قورىتىندىسى (DQ) الىنعان. كەلەسى قادام – ۆاليداتسيانى جۇزەگە اسىرۋ جانە GMP حالىقارالىق ستاندارتىنىڭ سەرتيفيكاتىن الۋ بولىپ وتىر. بۇل ماقساتقا «اتاباي» تۇرىك كومپانياسى تارتىلعان. اتالعان نىساندى ارالاعان ەرالى توعجانوۆ نىسان جۇمىسىنا وڭ باعا بەرىپ, مەملەكەت باسشىسىنىڭ تاپسىرماسىنا سايكەس وتاندىق ۆاكتسينا وندىرەتىن زاۋىت قۇرىلىسى بەلگىلەنگەن مەرزىمدە جۇرگىزىلىپ جاتقانىن اتاپ ءوتتى. سونىمەن قاتار, بيوفارماتسەۆتيكا زاۋىتى بيىل ىسكە قوسىلعاننان كەيىن ونىڭ بازاسىندا «QazVac» ۆاكتسيناسىن ءوندىرۋ جالعاساتىنى دا ايتىلدى.