بۇدان بىلاي قىلمىستىق جاۋاپكەرشىلىككە تارتىلعان قازاقستاندىقتار سولتۇستىك ماكەدونيادا جاسىرىنا المايدى. بۇگىن سەناتورلار ىزدەۋدە جۇرگەن ادامداردى ءبىر-بىرىنە ۇستاپ بەرۋ جانە سوتتالعان ادامداردى بەرۋ تۋرالى شارتتار توپتاماسىن راتيفيكاتسيالادى.
بۇل قۇجاتتاردا بەرۋ, قايتارۋ, كومەك كورسەتۋ نەمەسە باس تارتۋ جاعدايلارى ەگجەي-تەگجەيلى جازىلعان. سەناتورلار قۇقىقتىق كومەك تۋرالى مۇنداي كەلىسىمدەر شەتەلدە جۇرگەن قازاقستان ازاماتتارىنىڭ قۇقىقتارىن قورعاۋ ءۇشىن ماڭىزدى ەكەنىن اتاپ ءوتتى.
«بۇگىن قابىلدانعان زاڭدار قازاقستان مەن سولتۇستىك ماكەدونيا اراسىنداعى قۇقىق قورعاۋ سالاسىنداعى ىنتىمىقتاستىقتى دامىتۋعا باعىتتالعان. ولار قىلمىسكەرلەردى جاۋاپكەرشىلىككە تارتۋدىڭ ءارتۇرلى كەزەڭدەرىن قامتيدى جانە قىلمىسپەن كۇرەستى كۇشەيتۋ ءۇشىن مەملەكەتارالىق قاتىناستاردىڭ قۇقىقتىق نەگىزدەرىن قالىپتاستىرادى. سوعان سايكەس, قىلمىستاردى تەرگەۋ پروتسەسىندە جان-جاقتى كومەك كورسەتۋ, قىلمىسكەرلەردى ۇستاۋ جانە ولاردى ەكستراديتسيالاۋ, سوتتالعان ادامداردى بەرۋ سياقتى ءوزارا ءىس-ارەكەتتەر قاراستىرىلعان. بۇل زاڭنىڭ ۇستەمدىگىن قامتاماسىز ەتەدى. سونداي-اق, ازاماتتارىمىزدىڭ قۇقىقتارىن قامتاماسىز ەتۋگە مۇمكىندىك بەرەدى», دەدى ماۋلەن اشىمباەۆ.
قازاقستاننىڭ قۇقىق قورعاۋ قىزمەتتەرىنىڭ اقپاراتى بويىنشا, قازىرگى تاڭدا ەكى ەل اراسىندا ىزدەۋدە جۇرگەن ازاماتتار جوق. وسى رەتتە ەلىمىز بۇگىنگە دەيىن 30-عا جۋىق مەملەكەتپەن وسىنداي شارت جاساسقانىن ايتا كەتكەن ءجون. ال قازىرگى تاڭدا شەت ەلدەردە 922 قازاقستاندىق جازاسىن وتەپ جاتىر.