وسىدان ەكى جىل بۇرىن الماتى وبلىسىنىڭ كاسىپكەرلەر پالاتاسى مەن جەتىسۋ ۋنيۆەرسيتەتى بىرلەسىپ, StartUp Academy اشقان بولاتىن. مۇنداعى ماقسات جاستار اراسىنداعى كاسىپكەرلىكتى دارىپتەپ, عىلىمعا نەگىزدەلگەن ءارى يننوۆاتسيالىق الەۋەتى زور ستارتاپ جوبالاردى دايىنداۋ ەدى. بۇگىندە سول مۇراتقا تولىق قول جەتكەندەي.
جاقىندا Zhetysu – Startup يننوۆاتسيالىق يدەيالار مەن جوبالار بايقاۋىنىڭ قورىتىندىسى شىعارىلدى. بايقاۋعا وڭىردەگى ماڭدايالدى وقۋ ورنىنان 30 ستۋدەنت جانە نازارباەۆ زياتكەرلىك مەكتەبىنىڭ وقۋشىلارى ءتۇرلى جوبالارىن ۇسىنىپتى. سولاردىڭ ىشىندە جاڭالىعى مەن وزەكتىلىگى, ينۆەستيتسيالىق تارتىمدىلىعى, كوممەرتسيالاندىرۋ دەڭگەيى مەن ءوڭىر ءۇشىن الەۋمەتتىك-ەكونوميكالىق ماڭىزى جوعارى دەگەن 9 جوبا ۇزدىك دەپ تانىلعان ەكەن.
– بۇگىندە جاستار ستۋدەنت كەزىنەن باستاپ كاسىپپەن اينالىسقىسى كەلەدى. ولاردىڭ تالابىن شىڭداۋ ماقساتىندا ۋنيۆەرسيتتە Zhetysu – Startup اكادەمياسى اشىلعان بولاتىن. مۇندا جاستار بيزنەستىڭ العاشقى الىپپەسىن ۇيرەنەدى جانە وزدەرىنىڭ زەرتتەۋ جۇمىستارىن جۇرگىزىپ, نارىق الەمىن زەردەلەيدى. جاس عالىمداردىڭ يننوۆاتسيالىق الەۋەتىن دامىتىپ, ولاردىڭ جوباسىنىڭ ىسكە اسۋىن قارجىلاندىرۋ ءۇشىن ۋنيۆەرسيتەت ستارتاپ جوبالارعا بايقاۋ وتكىزىپ تۇرادى, – دەيدى جەتىسۋ ۋنيۆەرسيتەتىنىڭ باسقارما توراعاسى-رەكتور قۋات بايمىرزاەۆ.
بيىلعى ستارتاپ جوبالار بايقاۋىنىڭ باس جۇلدەسىن جەڭىپ العان م.بەيمبەتوۆا مەن ج.جەكسەنبايعا 100 مىڭ, 1 ورىن العان ا.ەسەيقىزى, ن.كيم, ءا.تاناباەۆاعا 70 مىڭعا سەرتيفيكات تابىستالدى. ال جوباعا قاتىسقان باسقا دا ستۋدەنتتەر ىنتالاندىرۋ سىيلىقتارىمەن ماراپاتتالدى.
جالپى, جەتىسۋ ۋنيۆەرسيتەتىندە ستۋدەنتتەردى ەكونوميكانىڭ جوعارى تەحنولوگيالىق سەكتورىن دامىتۋعا ىقپال ەتۋ باعىتىندا ءبىلىم بەرۋ ءۇردىسى قانات جايىپ كەلەدى. ياعني قازىرگى ءبىلىم بەرۋدىڭ ماڭىزدى مىندەتى يننوۆاتسياعا بەت بۇرۋ بولىپ وتىر. بۇل ماقساتقا جەتۋ ءۇشىن وقۋ ورنىنىڭ قابىرعاسىندا وزىق عىلىمي-زەرتتەۋ جۇمىسى جاسالۋى ءتيىس.
– ەكونوميكالىق ءوسۋ مەن ادامداردىڭ ءال-اۋقاتىنىڭ ارتۋى وزىق بىلىمگە بايلانىستى. ال وزىق ءبىلىم مەن عىلىمي يدەيالاردىڭ يەسى – ادام. ادامي كاپيتالدىڭ ساپاسىن ەكونوميكالىق وسىممەن سالىستىرۋعا بولادى. دەمەك, ادامي كاپيتالعا قۇيىلاتىن ينۆەستيتسيا ەكونوميكالىق وسۋگە ىقپال ەتەدى. بۇل تۇرعىدا ۋنيۆەرسيتەت ۇستازدارى ءبىلىم جانە عىلىم مينيسترلىگى جاريالاعان عىلىمي جوبالار بايقاۋىنا ءجيى قاتىسىپ ءجۇر. بيىلدىڭ وزىندە التى ارىپتەسىمىزدىڭ ەڭبەگى جوعارى باعالاندى. بۇل ءبىر جاعىنان جەتىسۋ عىلىمىنىڭ ءبىر ورىندا توقتاپ قالماي, زامان تالاپتارىنا ساي جاڭارىپ كەلە جاتقانىن اڭعارتادى, – دەيدى جەتىسۋ ۋنيۆەرسيتەتىنىڭ عىلىمي جۇمىستار جونىندەگى پرورەكتورى الەفتينا باحتاۋلوۆا.