الماتى قالاسى سانيتارلىق-ەپيدەميالىق باقىلاۋ دەپارتامەنتىنىڭ باسشىسى جانداربەك بەكشين پايدالانۋعا تىيىم سالعان جەكە قورعانىس قۇرالدارى (جقق) قالاي ساتىپ الىنعان؟ تولىق ءمان-جايدى ۆەدومستۆو باسشىسىنىڭ ورىنباسارى اسەل قالىقوۆا بايانداپ بەردى, دەپ حابارلايدى Egemen.kz
اسەل قالىقوۆانىڭ پىكىرىنشە, ۆەدومستۆو تاۋاردى جەتكىزۋشىلەردەن بىرنەشە رەت سوتتا ۇتىلىپ قالعان. مەكەمە باسشىلىعى 90 ملن تەڭگەنى كەرى قايتارعىسى كەلگەنىمەن, ءبارى اۋرەشىلىك بولعان. سەبەبى مەملەكەتتىك ورگان تاۋاردى قابىلداۋ كەزىندە مۇقيات تەكسەرىپ الماعان, سوندىقتان مەكەمەنىڭ ارىزى كەرى قايتارىلعان.
كەشە, 20 ءساۋىر كۇنى تىكەلەي ەفيردە قالانىڭ باس سانيتارى جقق-نىڭ قويماسىن كورسەتەدى. ەفير بارىسىندا ول مەديتسينالىق كوستيۋمدەر قولدانۋعا تىيىم سالىنعانىن جانە ۆيرۋسقا قارسى كۇرەستە مۇلدەم قورعامايتىنىن, كەرىسىنشە ەپيدەميولوگتەر مەن سانيتارلىق دارىگەرلەردىڭ دەنساۋلىعى ءۇشىن قاۋىپتى ەكەنىن ءتۇسىندىردى.
سونىمەن بىرگە ج.بەكشين ساپاسىز جەكە قورعانىس قۇرالدارىن ساتىپ الۋ جاۋاپكەرشىلىگى اسەل قالىقوۆاعا جۇكتەلگەنىن, ويتكەنى ول تەندەرلىك قۇجاتتارعا قول قويعانىن اتاپ ءوتتى.
وسى ورايدا اسەل قالىقوۆا باس سانيتاردىڭ ايتقان دايەكتەرى نەگىزسىز ەكەنىن العا تارتادى.
«بىرىنشىدەن, قر-دا مەملەكەتتىك ساتىپ الۋ بىرنەشە جىلدان بەرى «ەلەكتروندى پورتال» ارقىلى جۇزەگە اسىرىلىپ كەلەدى. سوندىقتان تىكەلەي قولتاڭباسى مەن ءمورى بار ەشقانداي قۇجاتتار بولماۋى ءتيىس. ەكىنشىدەن, جقق بويىنشا مەملەكەتتىك ساتىپ الۋ قر قولدانىستاعى زاڭناماسى اياسىندا ءوتتى. سونىمەن قاتار جەتكىزۋشىلەردەن تاۋاردى قابىلداۋعا قاتىسپادىم, ول ءۇشىن فۋنكتسيونالدىق مىندەتتەرىنە كىرەتىن لاۋازىمدى تۇلعالار انىقتالدى», دەپ ءتۇسىندىردى اسەل قالىقوۆا.
ايتا كەتەيىك, اسەل قالىقوۆا تەندەردى وتكىزۋ جانە تاۋاردى قابىلداۋ كەزىندە قالاداعى سانيتارلىق-ەپيدەميالىق باقىلاۋ دەپارتامەنتى باسشىسىنىڭ مىندەتىن اتقارۋشى بولعان. سول ۋاقىتتا جانداربەك بەكشين قالانىڭ باس سانيتارلىق دارىگەرى قىزمەتىن اتقاردى, ال ونىڭ باسشىسى رەسمي تۇردە كەيىنىرەك تاعايىندالدى.
«جانداربەك بەكشيننىڭ ءوزى كەلىسسوزدى مەملەكەتتىك ساتىپ الۋدى جەڭىپ العان جەتكىزۋشىلەرمەن جۇرگىزدى. بۇدان بولەك, ول سول ۋاقىتتا جەكە قورعانىس قۇرالدارىنىڭ بىرنەشە ءتۇرىن تاڭداپ العان», دەيدى ءا.قالىقوۆا.
ال اسەل قالىقوۆانىڭ پىكىرىنە اتالعان ۆەدومستۆونىڭ بۇرىنعى باسشىسى, قازىرگى ۋاقىتتا قالاداعى №27 اۋرۋحانانىڭ باس دارىگەرى ايزات مولداگاسيموۆا دا قوسىلىپ وتىر. ول دەپارتامەنتتىڭ ەكس-باسشىسى جانداربەك بەكشين ءىس جۇزىندە مەكەمەگە 2020 جىلدىڭ ساۋىرىندە قالانىڭ باس سانيتارلىق دارىگەرى رەتىندە تاعايىندالعانىن ايتتى.